Ish-kreu i Burgjeve paraqitet në Prokurorinë e Posaçme

Ish-drejtori i Përgjithshëm i Burgjeve, Agim Ismaili, është paraqitur sot në Prokurorinë e Posaçme kundër Korrupsionit dhe Krimit të Organizuar (SPAK), pasi ndaj tij ka nisur zyrtarisht një hetim penal.

Ismaili dyshohet se ka qenë i përfshirë në një tentativë hakerimi ndaj një institucioni shtetëror, e ndodhur disa muaj më parë.

Sipas burimeve pranë SPAK, hetimet janë hapur pas sinjalizimeve dhe verifikimeve të kryera nga autoritetet kompetente lidhur me këtë incident, ndërsa procedurat hetimore po zhvillohen në mënyrë intensive.

Qëllimi i Prokurorisë së Posaçme është të zbardhë të gjitha rrethanat e ngjarjes, të identifikojë mënyrën se si është tentuar ndërhyrja në sistemet e institucionit shtetëror, si dhe të përcaktojë rolin konkret dhe përgjegjësitë ligjore të ish-kreut të Burgjeve.