Ish-presidenti Ilir Meta kërkon 134 dëshmitarë në GJKKO

Seanca e radhës në Gjykatën e Posaçme Kundër Korrupsionit dhe Krimit të Organizuar (GJKKO) për ish-presidentin Ilir Meta zhvillohet sot në orën 10:00, në kuadër të hetimeve ndaj tij për korrupsion, pastrim parash dhe fshehje pasurie.

Në seancën pararendëse, mbrojtja ligjore e Metës, e përfaqësuar nga avokati Kujtim Cakrani, kërkoi kryerjen e një riekspertimi të plotë financiar për të ardhurat e tij që nga viti 1992. Paralelisht, u paraqit edhe një listë e zgjeruar me 134 persona që kërkohet të thirren si dëshmitarë. Në këtë listë përfshihen figura të njohura politike, përfshirë Kryeministrin Edi Rama, ish-deputetë, ish-bashkëpunëtorë të Metës në Lëvizjen Socialiste për Integrim, si dhe shtetas të huaj të lidhur me çështje të ndjeshme si CEZ-DIA dhe lobimi ndërkombëtar, mes tyre edhe ish-zyrtari Charles McGonigal.

Vendimmarrja përfundimtare mbi pranimin e dëshmitarëve i takon gjykatës, ndërkohë që edhe Prokuroria e Posaçme (SPAK) ka paraqitur një listë të sajën me rreth 110 emra që synon të thërrasë gjatë procesit.

Një zhvillim tjetër i rëndësishëm lidhet me ndryshimin e përfaqësimit ligjor të Metës. Pas seancës së fundit, studioja ligjore e Kujtim Cakranit bëri të ditur ndërprerjen e bashkëpunimit, duke argumentuar se marrëveshja është mbyllur për shkak të mungesës së besimit dhe bashkëpunimit mes palëve.

Në vijim, është bërë publike edhe një letër e shkruar me dorë nga vetë Ilir Meta, ku ai shpjegon se vendimi për ndryshimin e avokatit lidhet me nevojën për një përfaqësim ekskluziv, duke pasur parasysh kompleksitetin dhe voluminozitetin e çështjes. Deri në këtë fazë, nuk është bërë ende publik emri i avokatit të ri që do të marrë përsipër mbrojtjen e tij në vijim të procesit gjyqësor.