Ish zv.Kryeministrja sposton të besuarit e kryebashkiakut Fier

Belinda Balluku nuk ka më detyra në qeveri, por ka ende në dorë pushtetin e zgjeruar politik në Qarkun e Fierit, ku oreksi i saj për të ‘rehabilituar’ në institucionet vendore dhe qendrore njerëz të besuar të saj po përçan drejt pikës pa kthim socialistët në këtë qark.

Në këtë vazhdë janë edhe ndryshimet e fundit që kanë përfshirë grupin e këshilltarëve të Partisë Socialiste të Fierit.

Grupi deri më tani drejtohej nga Evis Sema, që mbante gjithashtu edhe postin e kryetares së këshillit të qarkut.

Ajo është shkarkuar nga detyra për t’i hapur rrugë emërimit të Marjus Vojës.

Në pamje të parë mund të duket një rrotacion mes socialistëve, por në vetvete këto ndryshime janë pjesë e luftës së brendshme mes klaneve të PS në Qarkun e Fierit, ku nga njëra anë është klani me të besuarit e Belinda Ballukut dhe përballë tyre ai i kryetarit të Bashkisë së Fierit, Armand Subashi.

Evis Sema ishte e njohur si pjesë e klanit Subashi, ndërsa personi që e zëvendëson atë, Marjus Voja është pjesë e klanit Balluku, kushëri me Arben Vojës, aktualisht drejtor i Spitalit të Fierit dhe gjithashtu mbështetës i Ballukut.

Këto zhvillime në nivel lokal sugjerojnë se ashpërsimi i luftës së klaneve brenda PS në nivel qendror po reflektohet me shpejtësi dhe gjithnjë e më thellë edhe në bazën e Partisë Socialiste.