Ja fituesit në degët e PD-së ku janë zhvilluar zgjedhje

Partia Demokratike ka përzgjedhur këtë fundjavë kryetarët e degëve lokale në disa prej qyteteve kryesore në vend.

Në krye të disa prej degëve kryesore në të gjithë vendin janë rikonfirmuar kryetarët aktualë, ndërkohë që procesi do të vijojë gjatë ditës së sotme dhe fundjavën e ardhshme.

Në zgjedhjet e zhvilluara për kreun e PD-së në Durrës, fitues ka dalë ish-ministri demokrat, Ferdinand Xhaferaj. Prej disa muajsh, Xhaferaj qëndronte në krye të kësaj dege si i komanduar nga Lulzim Basha, ndërkohë që pas zgjedhjeve të zhvilluara këtë të premte, Xhaferaj është mandatuar për një mandat 4-vjeçar.

Edhe deputeti i PD-së në Fier, Luan Baçi, është rizgjedhur në krye të degës në këtë qytet. Baçi ka deklaruar se do të vijojë të drejtojë degën e PD-së në Fier, pavarësisht faktit se ka mandatin e deputetit, duke theksuar se rezultatet e zgjedhjeve të fundit, pavarësisht manipulimeve, kanë sjellë rezultate të kënaqshme.

Një mandat të ri në krye të PD-së në Kamzë ka marrë edhe kryebashkiaku demokrat i Kamzës, Xhelal Mziu. Në kuadër të riorganizimit të PD-së, Basha thirri javën e kaluar grupin parlamentar dhe më pas firmosi urdhrin për strukturat, ku kërkoi që në periudhën mes 23 nëntorit dhe 2 dhjetorit të zgjidhen drejtuesit lokalë të PD-së në rrethe.

Në urdhrin e tij, Basha i ka kërkuar grupit të punës, që do të organizojë zgjedhjet, të mbështesë kandidatët dhe t’i sigurojë atyre akses të barabartë.

“Grupi i Punës mbështet kandidatët dhe i siguron akses të barabartë të tyre në: Listat e anëtarësisë. Prezencën e përfaqësuesve të kandidatëve në komisionin e votimit. Prezencën e përfaqësuesve të kandidatëve në procesin e numërimit të votave dhe shpalljen e rezultatit”, thuhet në udhëzimin e firmosur nga Basha.

Javën e ardhshme do të zgjidhen kryetarët në disa degë kryesore të vendit, përfshirë edhe krerët e degëve në Tiranë. Burime nga selia blu bëjnë me dije se risi në përfundim të këtij procesi do të jetë përzgjedhja e një figure qendrore në Tiranë, që do të koordinojë dhe organizojë demokratët në kryeqytet.

ZGJDHJET E PD NE RRETHE

QYTETI   – KRYETAR I ZGJEDHUR

Durrës – Ferdinand Xhaferaj

Fier – Luan Baçi

Dibër – Naim Gazidede

Sarandë – Hariz Mema

Kamzë – Xhelal Mziu

Malësi e Madhe – Anton Kokaj

Librazhd – Bujar Vreto

Maliq – Donald Kulla

Belsh – Bedri Qypi

Devoll – Arben Miza

Këlcyrë – Luan Malko

Shijak – Rezart Tusha