“Jemi banka”/ Mashtrimet me SMS false, një i arrestuar dhe një në kërkim

Një tjetër goditje ndaj krimit kibernetik është realizuar nga autoritetet shqiptare, pas zbulimit të një skeme mashtrimi që synonte vjedhjen e të dhënave bankare të qytetarëve përmes mesazheve të rreme.

Policia e Shtetit ka finalizuar operacionin e koduar “Banka e Rreme 2”, i cili çoi në identifikimin dhe ndalimin e një 25-vjeçari me shtetësi holandeze, i dyshuar si autor i kësaj veprimtarie kriminale. Ndërkohë, një tjetër person është shpallur në kërkim si bashkëpunëtor.

Hetimet zbuluan se bëhej fjalë për një fushatë të tipit “smishing”, ku qytetarëve u dërgoheshin SMS në emër të një banke, duke i ftuar të përditësonin të dhënat e tyre përmes një linku mashtrues. Ky link imitonte faqen zyrtare të institucionit financiar, duke i bërë viktimat të besonin se po vepronin në një platformë të sigurt.

Si pasojë, disa qytetarë ranë pre e mashtrimit, duke dhënë të dhënat e tyre bankare, të cilat më pas dyshohet se janë përdorur për përfitime të paligjshme.

Falë reagimit të shpejtë të Drejtorisë për Hetimin e Krimeve Kibernetike, në bashkëpunim me Drejtorinë Vendore të Policisë Tiranë dhe në koordinim me Prokurorin e Rrethit Gjyqësor Tiranë, u bë i mundur identifikimi dhe ndalimi i autorit të dyshuar, shtetasit I.K., 25 vjeç, me nënshtetësi holandeze.

Gjithashtu, është shpallur në kërkim shtetasi A.R., i dyshuar si bashkëpunëtor në këtë aktivitet kriminal. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Mashtrimi kompjuterik” dhe “Falsifikimi kompjuterik”.

Autoritetet theksojnë se hetimet vijojnë për të zbardhur plotësisht rrjetin dhe për të identifikuar persona të tjerë të përfshirë në këtë skemë mashtrimi.

Policia e Shtetit u bën thirrje qytetarëve të tregojnë kujdes maksimal ndaj çdo mesazhi apo linku të dyshimtë që kërkon të dhëna personale apo bankare, duke nënvizuar se asnjë institucion bankar nuk kërkon përditësim të të dhënave sensitive përmes SMS-ve ose linkeve të dërguara në telefon. Në çdo rast të dyshimtë, qytetarët duhet të raportojnë menjëherë pranë Policisë së Shtetit dhe pranë bankës së tyre.