Jo vetëm Këlliçi, dy deputetët e tjerë të PD-së drejt SPAK-ut

Gazetarja Klodiana Lala ka komentuar paraqitjen e deputetit të Partisë Demokratike, Belind Këlliçi, ditën e djeshme në Strukturën e Posaçme Kundër Korrupsionit dhe Krimit të Organizuar (SPAK).

Sipas Lalës, Këlliçi është paraqitur në kuadër të një hetimi pasuror, i cili lidhet me dosjen e njohur si “Partizani”, ku në qendër të hetimeve ndodhet ish-kryeministri Sali Berisha, së bashku me familjarë të tij.

Ajo theksoi se, në rastet e veprave penale të lidhura me korrupsionin, verifikimi i pasurisë është procedurë standarde, ndërsa në këtë kuadër hetimet janë shtrirë edhe mbi aktivitetet politike të lidhura me procesin e Rithemelimit të Partisë Demokratike.

Sipas informacioneve të gazetares, Belind Këlliçi është marrë në pyetje nga hetuesit e Byrosë Kombëtare të Hetimit (BKH) në lidhje me organizimin dhe financimin e Kuvendit Kombëtar të Rithemelimit të PD-së, i mbajtur më 11 dhjetor 2021.

Ky aktivitet politik përkoi me përplasjen e fortë brenda Partisë Demokratike mes Sali Berishës dhe ish-kryetarit të saj, Lulzim Basha, për çështjen e vulës dhe drejtimit të partisë.

Këlliçi është pyetur mbi:

• mënyrën e organizimit të Kuvendit,

• burimet e financimit të aktivitetit,

• si dhe nëse këto financime janë realizuar në përputhje me legjislacionin në fuqi.

Në kuadër të të njëjtit hetim, sipas Lalës, pritet që në SPAK të paraqiten edhe deputetët Flamur Noka dhe Albana Vokshi.

Gazetarja theksoi se mbetet për t’u parë nëse ky proces hetimor do të sjellë zhvillime të reja apo pasoja konkrete në vijim.