Jo vetëm Zvërnecit, Rama: I ka dalë pronari edhe Teatrit të Butrintit

Kryeministri Edi Rama zhvilloi këtë të premte një takim me banorët e zonës së Zvërnecit, ku në fokus ishte projekti i investimit që pritet të zbatohet në këtë territor me rëndësi të veçantë turistike dhe mjedisore.

Gjatë bashkëbisedimit, kreu i qeverisë ngriti shqetësimin për fenomenin e tjetërsimit të pronave në jug të vendit, duke sjellë në vëmendje raste që ai i cilësoi si problematike dhe në disa raste edhe absurde.

Rama u ndal veçanërisht te një situatë e pazakontë që lidhet me Parkun Kombëtar të Butrintit, ku sipas tij, individë apo familje pretendojnë pronësi mbi pasuri historike dhe publike, duke u mbështetur në dokumente të vjetra.

Ai theksoi se ka pasur pretendime për prona edhe në zona detare, ku sipas tij janë përdorur dokumente të pajisjes me AMTP për të justifikuar pronësi mbi territore ku realisht nuk ka ekzistuar tokë.

Në të njëjtën linjë, Rama përmendi edhe rastin e Teatrit Antik të Butrintit, për të cilin, sipas tij, ka dalë një pretendues që e lidh pronësinë me dokumente që datojnë që nga periudha osmane.

Sipas kryeministrit, këto pretendime tregojnë për një problem të thellë me regjistrimin dhe verifikimin e pronave, sidomos në zona me rëndësi historike dhe turistike, duke kërkuar më shumë kontroll dhe transparencë në trajtimin e tyre.

Deklaratat e tij vijnë në një moment kur debati për zhvillimin dhe investimet në zonat bregdetare është intensifikuar, ndërsa çështjet e pronësisë mbeten një nga sfidat më të mëdha ligjore dhe institucionale në vend.