Joan Laporta rizgjidhet president i Barcelonës deri në vitin 2031

Presidenti aktual i klubit spanjoll FC Barcelona, Joan Laporta, ka fituar sërish zgjedhjet presidenciale të klubit katalanas, duke mundur rivalin e tij Victor Font.

Zgjedhjet u zhvilluan këtë të dielë në Barcelonë dhe rezultati përfundimtar konfirmoi dominimin e Laportës, i cili u rizgjodh nga anëtarët e klubit (socios) me rreth 58% të votave.

Procesi zgjedhor u zhvillua në një atmosferë optimiste për klubin katalanas, sidomos pas fitores bindëse 5-2 ndaj Sevilias. Pas kësaj ndeshjeje, edhe futbollistët e Barcelonës morën pjesë në votim dhe shprehën publikisht mbështetjen e tyre për Laportën.

Me këtë fitore, Laporta do të qëndrojë në krye të klubit deri në vitin 2031. Objektivi i tij kryesor mbetet rikthimi i Barcelonës në majën e futbollit europian dhe fitimi i sërishëm i trofeut të UEFA Champions League.

Klubi katalanas nuk e ka fituar këtë kompeticion që prej vitit 2015, kur Barcelona triumfoi për herë të fundit në arenën më të rëndësishme të futbollit europian.