‘Kërcet’ thika në Fier, xhaxhai plagos nipin

Një incident i rëndë ka tronditur qytetin e Fierit, ku një konflikt familjar ka përfunduar në dhunë fizike. Një 71-vjeçar dyshohet se ka plagosur me thikë nipin e tij, djalin e vëllait, pas një përplasjeje që paraprakisht mendohet të ketë ndodhur për arsye të parëndësishme.

Ngjarja ka ndodhur në banesë, ndërsa i plagosuri, 50 vjeç, ka marrë ndihmën e nevojshme mjekësore. Fatmirësisht, sipas burimeve, ai ndodhet jashtë rrezikut për jetën.

Menjëherë pas sinjalizimit, shërbimet e policisë kanë ndërhyrë duke vënë në pranga autorin e dyshuar. Gjatë kontrollit në banesën e tij, uniformat blu kanë gjetur dhe sekuestruar edhe një sasi fishekësh, të cilët do të shërbejnë si provë materiale në hetim.

Autoritetet bëjnë me dije se hetimet vijojnë për zbardhjen e plotë të rrethanave të kësaj ngjarjeje, ndërsa pritet që materialet procedurale t’i kalojnë organit të prokurorisë për veprime të mëtejshme ligjore.