Taulant Tafa dhe Izabela Radovani

Tiranë, 30 shtator 2025 – Kolegji i Posaçëm i Apelimit (KPA) ka vendosur të lërë në fuqi dy shkarkime nga detyra të vendosura më herët nga Komisioni i Pavarur i Kualifikimit (KPK), duke vulosur përfundimisht largimin nga sistemi të gjyqtarëve Taulant Tafa dhe Izabela Radovani.

Shkarkimi i gjyqtarit Taulant Tafa

Vendimi për gjyqtarin e Gjykatës së Elbasanit, Taulant Tafa, u mor nga trupi gjykues i KPA, i përbërë nga Albana Shtylla (kryesuese), Sokol Çomo (relator), Ina Rama, Mimoza Tasi dhe Rezarta Schuetz (anëtare).

Në njoftimin zyrtar thuhet se, në përfundim të shqyrtimit, u vendos lënia në fuqi e vendimit nr. 649, datë 24.04.2023 të KPK, që kishte sanksionuar shkarkimin e Tafës për probleme të rënda gjatë procesit të rivlerësimit. Ky vendim është përfundimtar dhe hyn në fuqi menjëherë.

Shkarkimi i gjyqtares Izabela Radovani

E njëjta linjë u ndoq edhe për gjyqtaren e Gjykatës së Shkodrës, Izabela Radovani.

Trupi gjykues i KPA, i përbërë nga Ina Rama (kryesuese), Sokol Çomo (relator), Albana Shtylla, Natasha Mulaj dhe Rezarta Schuetz (anëtare), shpalli vendimin për çështjen nr. 34/2023, duke lënë në fuqi vendimin nr. 647, datë 14.04.2023 të KPK.

Sipas dosjes së rivlerësimit, Radovani kishte mospërputhje në deklarimin e pasurive, mungesa financiare për justifikimin e tyre, si dhe transaksione të dyshimta për një apartament. Ajo e nisi karrierën në drejtësi si ndihmësgjyqtare në vitin 1996, ndërsa prej vitit 2000 ka shërbyer si gjyqtare në Shkodër për më shumë se dy dekada.

Vendime përfundimtare

Të dy vendimet e KPA janë përfundimtare dhe me efekt të menjëhershëm, duke mbyllur kështu çdo mundësi ankimimi nga ana e gjyqtarëve të shkarkuar.

Procesi i vetingut vijon të prodhojë pasoja të rënda për trupën gjyqësore, ku dhjetëra gjyqtarë dhe prokurorë janë larguar nga sistemi për shkak të problemeve me pasurinë, pastërtinë e figurës apo aftësitë profesionale.