KPA shkarkon nga sistemi i drejtësisë 13 ish-gjyqtarë dhe ish-prokurorë

Kolegji i Posaçëm i Apelimit ka rrëzuar këtë të mërkurë 13 kërkesa për rishikim të paraqitura nga gjyqtarë dhe prokurorë, duke lënë në fuqi vendimet e mëparshme për shkarkimin e tyre nga sistemi i drejtësisë.

Trupat gjykuese, të përbëra nga Ina Rama, Natasha Mulaj, Albana Shtylla, Mimoza Tasi, Rezarta Schuetz dhe Sokol Çomo, shqyrtuan në total 14 kërkesa, nga të cilat 13 u refuzuan, duke vendosur mospranimin e tyre.

Ndër kërkesat e rrëzuara janë ato të ish-gjyqtares Alma Brati, ish-prokurorit Arben Dollapaj, ish-prokurorit Ardian Ylli, ish-drejtuesit të Prokurorisë së Kavajës Artan Madani, ish-gjyqtarit Astrit Faqolli, ish-gjyqtares Bernina Kondi, ish-gjyqtarit Bledar Abdullai, ish-prokurorit Dritan Peka, ish-prokurorit Dritan Rreshka, ish-prokurorit Elsion Sadiku, ish-gjyqtares Entela Prifti, ish-prokurorit Gentian Trenova dhe ish-gjyqtarit Kastriot Gramshi.

Sipas njoftimit zyrtar, vendimet janë marrë me shumicë votash, në bazë të neneve 494 dhe 498 të Kodit të Procedurës Civile.