Kryebashkiaku i Vaut të Dejës paraqitet në SPAK

Kryetari i Bashkisë së Vaut të Dejës, Kristjan Shkreli, është paraqitur sot në ambientet e SPAK, ku mësohet se i është komunikuar akuza për korrupsion zgjedhor.

Shkreli kishte marrë më herët fletëthirrje nga Prokuroria e Posaçme, dhe gjatë paraqitjes së tij ishte i shoqëruar nga avokati mbrojtës.

Hetimet ndaj kryebashkiakut janë zhvilluar në kuadër të një dosjeje që lidhet me dyshimet për përfshirje në shit-blerje votash, në favor të Partisë Socialdemokrate (PSD) në zgjedhjet parlamentare të vitit 2021 në qarkun e Shkodrës.

Sipas mediave, SPAK kishte marrë autorizim nga Gjykata e Posaçme për ushtrimin e kontrollit personal ndaj Shkrelit. Vendimi është ekzekutuar nga Byroja Kombëtare e Hetimit (BKH) në bashkëpunim me Policinë e Shtetit.

Në vijim të hetimeve, janë sekuestruar celularët e disa personave të tjerë, të cilët konsiderohen si mbështetës të PSD-së, dhe që dyshohet se janë të përfshirë në veprimtarinë kriminale të manipulimit elektoral përmes shitblerjes së votës.