Kush është Klodian Braho, “timonieri” i ri i SPAK-ut

Klodian Braho është zgjedhur kreu i ri i Prokurorisë së Posaçme Kundër Korrupsionit dhe Krimit të Organizuar (SPAK), pas një procesi të zhvilluar nga Këshilli i Lartë i Prokurorisë (KLP). Ai mori 7 vota pro, duke lënë pas kandidatët e tjerë: Adnan Xholi me 3 vota dhe Elvin Gokaj me 1 votë.

Braho do të udhëheqë SPAK për një mandat trevjeçar, duke pasuar Altin Dumanin, i cili përfundon mandatin më 18 dhjetor. Dorëzimi i detyrës do të bëhet zyrtarisht më 19 dhjetor 2025 në një ceremoni të posaçme.

Karriera dhe përvoja e Klodian Brahos

Klodian Braho u emërua në SPAK më 19 dhjetor 2019, pas konfirmimit nga Komisioni i Pavarur i Kualifikimit, në kuadër të procesit të rivlerësimit. Ai nisi karrierën në sistemin e drejtësisë më 14 nëntor 2007, pas përfundimit të studimeve në Fakultetin e Drejtësisë në Universitetin e Tiranës dhe Shkollën e Magjistraturës.

Fillimisht punoi si prokuror në Prokurorinë pranë Gjykatës së Rrethit Gjyqësor Berat deri në vitin 2012, më pas u transferua në Prokurorinë e Vlorës, ku shërbeu deri në vitin 2015, përfshirë një periudhë si zëvendësdrejtues. Në vitin 2015, u emërua në Prokurorinë për Krime të Rënda në Tiranë, duke u angazhuar në hetime të çështjeve me rëndësi të veçantë. Pas krijimit të SPAK, ai u integrua në strukturën e re dhe ka ndjekur raste që lidhen me zyrtarë të lartë dhe krim të organizuar, përfshirë hetimin ndaj ish-kryeprokurorit Adriatik Llalla.

Në korrik të vitit 2019, Komisioni i Pavarur i Kualifikimit e konfirmoi në detyrë, duke i hapur rrugë karrierës së tij në SPAK. Ai u përfshi edhe në procesin e kandidimit për kreun e SPAK në vitin 2022, por më pas u tërhoq nga gara. Në mars të vitit 2023 dha dorëheqje nga një pjesë e një dosjeje që po hetohej për çështjen e inceneratorëve, pas pretendimeve për mungesë transparence në veprimet procedurale.

Zgjedhja e Brahos vjen pas një procesi të ndjekur nga afër edhe nga ndërkombëtarët, duke treguar rëndësinë e rolit të SPAK në luftën kundër korrupsionit dhe krimit të organizuar në Shqipëri.