Ky është 47-vjeçari që u vra për një vend parkimi

Është bërë publike fotografia e 47-vjeçarit Skerdilajd Isufi, i cili humbi jetën tragjikisht pas një konflikti me thikë gjatë ditës së sotme.

Sipas informacioneve paraprake, ngjarja dyshohet të ketë nisur për një vend parkimi. Viktima kishte lënë automjetin pranë banesës së bashkëmoshatarit të tij, Roland Puja, çka ka sjellë një debat të ashpër mes tyre. Përplasja verbale më pas është përshkallëzuar në dhunë fizike, duke përfunduar në mënyrën më të rëndë të mundshme.

Goditjet me mjet prerës rezultuan fatale për Isufin. Ai u transportua me urgjencë drejt spitalit, por pavarësisht përpjekjeve të mjekëve, nuk arriti t’u mbijetojë plagëve të marra.

Ngjarja ka tronditur komunitetin, ndërsa autoritetet po vijojnë hetimet për zbardhjen e plotë të rrethanave dhe përgjegjësive ligjore.