Ky është efektivi i policisë u vra nga ish-ushtaraku në Maliq

Një operacion policor i zhvilluar në orët e para të mëngjesit në zonën e Lozhanit, në Maliq, është shndërruar në një ngjarje tragjike, ku një efektiv i forcave “Shqiponja” ka humbur jetën, ndërsa një tjetër ka mbetur i plagosur rëndë.

Burime zyrtare konfirmojnë se viktima është efektivi Enena Mekolli, pjesë e repartit special “Shqiponja”.

Nndërsa i plagosur ka mbetur kolegu i tij, Edison Adri, i cili ndodhet nën kujdesin e mjekëve.

Ngjarja ndodhi gjatë një operacioni për kapjen e një personi të shpallur në kërkim, shtetasi Violand Braçellari, ish-ushtarak. Ky i fundit ishte në kërkim nga Prokuroria e Vlorës për çështje që lidhen me aktivitetin e paligjshëm të narkotikëve.

Sipas të dhënave paraprake, gjatë ndërhyrjes së forcave të policisë për arrestimin e tij, Braçellari ka reaguar me armë zjarri, duke çuar në një shkëmbim të fortë zjarri me efektivët në terren. Si pasojë, polici Mekolli mbeti i vrarë, ndërsa Adri u plagos rëndë.

Pas përplasjes, autori i dyshuar është neutralizuar dhe vënë në pranga nga policia. Raportohet se edhe ai ka marrë plagë gjatë shkëmbimit të zjarrit dhe ndodhet në spital nën mbikëqyrje.

Operacioni u zhvillua në një zonë të thellë periferike dhe malore, çka e ka bërë edhe më të vështirë ndërhyrjen e forcave të rendit.

Autoritetet kanë nisur hetimet për të zbardhur plotësisht dinamikën e ngjarjes, ndërsa rasti ka tronditur opinionin publik dhe ka rikthyer vëmendjen mbi rrezikun që përballin efektivët e policisë në përballje me persona të armatosur dhe të rrezikshëm.

Ngjarja në Maliq konsiderohet një nga më të rëndat e kohëve të fundit që përfshin përplasje të armatosur mes policisë dhe personave në kërkim.