Ky është efektivi që mbeti i plagosur gjatë aksionit në Maliq

Një operacion policor në zonën e Lozhanit, në Bashkinë Maliq, është shndërruar në një ngjarje tragjike mëngjesin e sotëm, ku një efektiv i Forcës së Posaçme “Shqiponja” ka humbur jetën dhe një tjetër ka mbetur i plagosur gjatë shkëmbimit të zjarrit me një person të shpallur në kërkim.

Viktima është identifikuar si Enea Mekolli, 34 vjeç, i cili humbi jetën në krye të detyrës, ndërsa kolegu i tij, Edison Adri, 36 vjeç, mbeti i plagosur dhe po merr ndihmë mjekësore.

Sipas të dhënave zyrtare, operacioni u zhvillua rreth orës 07:30, pas informacioneve për vendndodhjen e një personi me rrezikshmëri të lartë, i identifikuar si Violand Braçellari, 43 vjeç. Ky i fundit ishte fshehur në një stan në zonën malore të Lozhanit, ndërsa ndaj tij rëndonin precedentë penalë për vepra të lidhura me narkotikët.

Forcat e policisë kanë rrethuar zonën dhe i kanë bërë thirrje të dorëzohej, por ai ka refuzuar dhe ka hapur zjarr në drejtim të efektivëve. Si pasojë e sulmit, inspektori Mekolli ka humbur jetën, ndërsa inspektori Adri ka mbetur i plagosur.

Në përpjekje për të neutralizuar rrezikun, shërbimet e policisë janë kundërpërgjigjur me armë zjarri, duke plagosur autorin, i cili më pas është vënë në pranga.

Në vendngjarje është dërguar edhe helikopteri i urgjencës për transportimin e të plagosurve, ndërsa grupi hetimor, në bashkëpunim me Prokurorinë dhe Agjencinë e Mbikëqyrjes Policore, po vijon punën për zbardhjen e plotë të rrethanave të kësaj ngjarjeje të rëndë.

Kjo ngjarje ka tronditur opinionin publik, duke rikthyer në vëmendje rrezikun me të cilin përballen çdo ditë efektivët e policisë gjatë përmbushjes së detyrës.