Ky është i riu që përballoi i vetëm plot 6 policët

Pamjet e një protestuesi të gjakosur, i cili shfaqet i prangosur gjatë ndërhyrjes së policisë, kanë tërhequr vëmendjen pas përplasjeve të regjistruara gjatë protestës së studentëve.

Bëhet fjalë për të njëjtin të ri që, sipas pamjeve të publikuara më herët në rrjetet sociale, u përball fizikisht me gjashtë efektivë të Forcave të Ndërhyrjes së Shpejtë (FNSH). Në atë moment, ai shihet duke goditur me grushte punonjësit e policisë, ndërsa këta të fundit reagojnë duke përdorur shkopinjtë e gomës.

Ngjarja është rikthyer në vëmendje pas publikimit të një videoje nga deputeti i Partisë Mundësia, Erald Kapri, i cili u përplas me forcat e rendit gjatë arrestimit të studentëve protestues.

Në pamjet e shpërndara prej tij, Kapri dëgjohet duke kërkuar shpjegime nga efektivët për mënyrën se si ishin trajtuar të rinjtë. Deputeti paralajmëroi gjithashtu se punonjësit e policisë që, sipas tij, kanë ushtruar dhunë ndaj protestuesve duhet të përgjigjen për veprimet e tyre përpara ligjit.

Reagimi i Kaprit e zhvendosi vëmendjen jo vetëm te përplasja fizike e ndodhur më herët mes të riut dhe efektivëve të FNSH-së, por edhe te pamjet e studentëve të shoqëruar në automjetet e policisë, disa prej të cilëve shfaqen me shenja dhune.

Rrethanat e plota të ndërhyrjes dhe përgjegjësitë për pretendimet mbi përdorimin e forcës mbeten çështje që kërkojnë sqarim nga autoritetet përkatëse.