Labinot Rexha rrëfen prapaskenat e konfliktit mes Jozefin Markut dhe Eduard Kuçit

Këngëtari Labinot Rexha ka ndarë detaje të reja rreth konfliktit që ka përfshirë Jozefin Markun dhe Eduard Kuçin, duke treguar edhe përpjekjen e tij për të komunikuar me familjarët e Kuçit pas përplasjes.

I ftuar në emisionin “Shqipëria Live”, me moderatore Sidorela Gjonin, Rexha tha se kishte tentuar të kontaktonte babanë e Eduard Kuçit për të kuptuar më shumë rreth situatës, por ai kishte zgjedhur të mos fliste për ngjarjen.

Sipas këngëtarit, familja e Kuçit është prekur nga ajo që ka ndodhur, ndërsa ai vetë pretendon se është përballur me kërcënime për shkak të faktit se njeh të dyja palët dhe ka marrëdhënie miqësore me ta.

“Unë mora edhe një iniciativë për të folur me babain e Edit, por ai nuk donte të fliste. Më tha: ‘Të lutem, për këtë punë mos më thirr më’. Ata nuk pranojnë, por unë e lus Zotin që kjo të jetë hera e fundit, e keqja vjen shumë shpejt.”

Rexha: Nuk besoj se Jozi është djalë i keq

Duke folur për dy personat e përfshirë në konflikt, Rexha u shpreh se i njeh personalisht të dy dhe nuk e konsideron Jozefin Markun si një person me natyrë të keqe.

Ai tha gjithashtu se ka një marrëdhënie të mirë me Eduard Kuçin dhe se ka pasur mundësi ta njohë nga afër.

“Unë nuk besoj që Jozi është djalë i keq, por edhe Edi, po të rrish nja 2 minuta me të, thotë fjalë të mira, jemi bërë shokë, ai ta jep shpirtin edhe zemrën.”

Këngëtari bëri apel që konflikti të mos përshkallëzohet më tej dhe që palët të gjejnë një mënyrë për t’u pajtuar.

“Shpresoj që të dyja palët të pajtohen sa më shpejt. Më thonë pse e përkrah Edin. Unë njoh edhe Edin, edhe Jozin, se kam kënduar me të.”

Rexha tha se pozicioni i tij mes dy palëve e ka vendosur edhe vetë në një situatë të vështirë.

“Babanë e Edit dhe familjen e tyre e ka prekur ngjarja. A e di sa kërcënime kam marrë unë, që kam qenë herë me atë, herë me këtë.”

Çfarë fshihej pas postimit për kërcënimet?

Gjatë intervistës, Labinot Rexha foli edhe për një Insta-Story të publikuar prej tij pak ditë më parë, përmes të cilit kishte bërë të ditur se ishte kërcënuar.

Këngëtari sqaroi se ky episod nuk lidhet me konfliktin mes Jozefin Markut dhe Eduard Kuçit, por me një problem të vjetër që familja e tij ka pasur me një fqinj.

Sipas Rexhës, mosmarrëveshja lidhet me pronësinë e një sipërfaqeje të vogël toke, prej vetëm disa metrash katrorë.

“Ky problem është i hershëm, për pronësinë me një komshi. Bëhet fjalë për nja 2-3 metër katror. Ata kur mbeten pa lekë më acarojnë mua. Ma bëjnë gjithmonë kështu.”

Ai tregoi se situata është përshkallëzuar edhe me ofendime dhe një incident fizik.

“Ata më shanë mua dhe mamin tim, me fjalë banale, me fjalë të ulëta dhe të shpifura. Edhe një vëlla i tyre më goditi pak.”

Rexha tha se pas incidentit ka njoftuar policinë, duke theksuar se është përpjekur ta menaxhojë situatën pa e përshkallëzuar më tej.

“Thirra policinë, me maturi dhe qetësi dhe gjakftohtësi.”

Deklaratat e këngëtarit rikthejnë në vëmendje dy episode të ndryshme, por që sipas tij kanë ndikuar në jetën e tij personale: konflikti mes Jozefin Markut dhe Eduard Kuçit, si dhe një mosmarrëveshje e hershme për pronësinë me një fqinj.