Ish-deputetja socialiste i bashkohet protestës

Përplasjet dhe tensionet gjatë protestës së kësaj të enjteje përpara Kuvendit u pasuan nga shoqërimi i disa pjesëmarrësve në polici. Mes të ndaluarave nga forcat e rendit janë edhe dy aktiviste: antropologia gjuhësore amerikane Carrie Ann Morgan dhe artistja e ilustruesja Elsa Paja.

Lajmin e ka bërë të ditur ish-deputetja e Partisë Socialiste, Ledi Shamku Shkreli, përmes një reagimi në rrjetet sociale. Shamku e ka cilësuar veprimin e policisë si të pajustifikuar, ndërsa njoftoi se do të shkojë personalisht në Komisariatin nr. 3 në Tiranë për t’u dalë në mbrojtje dy mikeshave dhe kolegeve të saj.

Slogani që po bën xhiron e rrjetit

Përmes një mesazhi të drejtpërdrejtë, ish-deputetja ngriti pyetjen simbolike që, sipas saj, përmbledh më së miri frymën e këtij tubimi: “Po ti, nga cila anë e gardhit je?”

Në postimin e saj, Shamku shkruan:

“Carrie Ann Morgan, antropologe gjuhësore, kolegia ime, studiuese dhe shpirt i lirë, u shoqërua sot gjatë protestës.

Elsa Paja, artiste, ilustratore, mikja ime, një shpirt po aq i bukur sa vetë Vjosa-Narta që ajo mbron, u shoqërua sot.

Mendoj se nga sot, slogani më i gjetur i kësaj proteste është: ‘Po ti, nga cila anë e gardhit je?’

Shihemi për pak në Komisariatin nr. 3, ku mbahen të shoqëruara Carrie dhe Elsa!”

Tubimi përpara parlamentit u shoqërua me momente të tensionuara, ku forcat e rendit përdorën gaz lotsjellës dhe spraj piper për të shpërndarë protestuesit, çka çoi edhe në shoqërimin e disa prej tyre në komisariate.