Lëvizje dhe transferime, çfarë po ndodh në Burgun e Durrësit?

Pas arratisjes së Altin Ndocit, Drejtoria e Përgjithshme e Burgjeve ka nisur zhvendosjen e disa të paraburgosurve nga Institucioni i Ekzekutimit të Vendimeve Penale në Durrës drejt Burgut të Fierit dhe institucioneve të tjera penitenciare.

Burime zyrtare bëjnë me dije se transferimet po kryhen nën masa të rrepta sigurie dhe kanë të bëjnë vetëm me persona që konsiderohen me rrezikshmëri të lartë. Sipas të njëjtave burime, nuk bëhet fjalë për të paraburgosur për çështje politike apo korrupsioni, por për individë të përfshirë në krime të rënda.

Burgu i Durrësit nuk klasifikohet si institucion i sigurisë së lartë, ndaj autoritetet kanë vlerësuar se qëndrimi i personave me rrezikshmëri të shtuar në këtë IEVP nuk është i përshtatshëm në kushtet aktuale.

Aktualisht nuk dihet motivacioni i plotë i kësaj lëvizjeje, ndërsa autoritetet pritet të japin informacion zyrtar në vijim lidhur me masat e marra për rritjen e sigurisë në institucionet penitenciare.