Lojërat e fatit/ Arrestohen dy persona në Fier, procedohen 16 të tjerë

Një aktivitet i dyshuar i paligjshëm i lojërave të fatit është zbuluar nga Policia e Fierit gjatë një operacioni të koduar “No Games”, i zhvilluar në një lokal në lagjen “Kastriot”.

Gjatë kontrollit të ambienteve, efektivët konstatuan se lokali ishte përshtatur për zhvillimin e lojërave të fatit. Në momentin e ndërhyrjes, në ambient ndodheshin 16 persona, të cilët u kapën duke marrë pjesë në lojë.

Në vijim të veprimeve të kryera nga policia, u arrestuan 49-vjeçarja Dh. Sh., administratore e lokalit dhe banuese në Fier, si edhe 43-vjeçari R. C., banues në Tiranë, i dyshuar nga autoritetet si personi që organizonte aktivitetin e lojërave të fatit.

Ndërkohë, 16 personat e gjetur duke luajtur nuk u arrestuan, por u proceduan penalisht në gjendje të lirë.

Gjatë kontrollit, policia sekuestroi edhe një sërë sendesh që dyshohet se përdoreshin për zhvillimin e aktivitetit. Në cilësinë e provës materiale u morën një tavolinë pokeri, një kuti me 500 çipsa, gjashtë pako me letra bixhozi, pesë telefona celularë dhe 8 mijë euro.

Pas përfundimit të veprimeve të para hetimore, materialet procedurale i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Fier, për vijimin e procedurave ligjore.

Operacioni “No Games” vjen në kuadër të kontrolleve të policisë ndaj ambienteve ku dyshohet se zhvillohen lojëra fati në kundërshtim me ligjin.