Lojërat Mesdhetare, Shqipëria koleksionon tre medalje në ‘Taranto 2026’

Shqipëria ka siguruar medaljen e parë të artë në Lojërat Mesdhetare “Taranto 2026”, falë suksesit të mundësit Islam Dudaev në kategorinë deri në 74 kilogramë, në stilin e lirë.

Dudaev u shpall kampion pasi kundërshtari i tij në finalen e madhe, Fati Vejseli, që përfaqëson Maqedoninë e Veriut, nuk mundi ta përfundonte duelin për shkak të një dëmtimi. Në momentin kur ndeshja u ndërpre, mundësi shqiptar ishte në avantazh.

I lindur në Dagestan të Rusisë, Dudaev përfaqëson Shqipërinë në arenën ndërkombëtare që prej vitit 2022. Ai ka ndërtuar një karrierë të pasur me rezultate të rëndësishme, ku spikasin medalja e bronztë olimpike, tituj dhe medalje të tjera në kampionatet evropiane, si dhe suksesi i fundit në Lojërat Mesdhetare.

Për Fati Vejselin, përfundimi i finales i siguroi medaljen e argjendtë, duke shtuar një tjetër rezultat të rëndësishëm në karrierën e tij sportive.

Abakarov merr medaljen e argjendtë

Shqipëria ka festuar edhe një tjetër sukses në mundje, me Zelimkhan Abakarov që u rendit i dyti në kategorinë deri në 65 kilogramë, në stilin e lirë.

Edhe Abakarov, me origjinë nga Dagestani, arriti deri në finalen e kategorisë, por u mposht nga turku Ahmet Duman me rezultatin 4-2. Në këtë mënyrë, ai u detyrua të kënaqej me medaljen e argjendtë.

Zeneli siguron medaljen e bronztë

Një ditë më herët, delegacioni shqiptar kishte siguruar edhe medaljen e parë në mundje, me Ardit Zenelin që u ngjit në podium në kategorinë deri në 67 kilogramë, në stilin greko-romak.

Zeneli fitoi duelin për medaljen e bronztë ndaj grekut Stavros Ntounias me rezultatin 9-8. Përballja ishte mjaft e luftuar, me mundësin shqiptar që arriti të përmbyste rezultatin dhe të siguronte vendin në podium.

Me triumfin e Islam Dudaev, Shqipëria numëron tashmë tre medalje në Lojërat Mesdhetare “Taranto 2026”: një medalje të artë, një të argjendtë dhe një të bronztë. Suksesi i Dudaevit i jep delegacionit shqiptar edhe medaljen e parë të artë në këtë edicion.