Lufta e imazheve: Strategjia e pushtetit për të “zbutur” Revolucionin e Flamingove

Ditën e sotme, mediat kryesore në vend janë zgjuar me një linjë të qartë dhe të koordinuar editoriale: fokusimi absolut te ngjarjet e djeshme në Rinas, gjatë marshimit të ditës së 15-të të protestës. Tituj si “Kush ishte në krye të protestës që i çoi protestuesit në Rinas?” apo “Protestuesit tensionohen me njëri-tjetrin” kanë pushtuar hapësirën publike.

Por, pas kësaj zhurme mediatike, fshihet një tentativë e pastër për të devijuar vëmendjen nga thelbi i kauzës.

Shashka e Rinasit: Një përçarje e qëllimshme

Sipas burimeve dhe analizës së zhvillimeve në terren, paqartësia e krijuar dje në Rinas nuk erdhi si pasojë e humbjes së kontrollit nga qytetarët, por nga ndërhyrja e qëllimshme e policëve të infiltruar. Qëllimi ishte i qartë:

Të krijohej narrativa se protesta po bllokon qytetarët që duan të udhëtojnë.

Të mbillet fryma e përçarjes brenda strukturës së protestës.

Të goditet modeli i suksesit të një organizimi horizontal (pa udhëheqës të vetëm), të cilin pushteti e ka të pamundur ta kontrollojë apo ta blejë.

“Gjithë qëllimi mbështetet në faktin e padurimtë se kjo protestë duhet përçarë një orë e më parë, sepse qeveria nuk po mundet dot t’i kontrollojë dot format e saj të organizimit.”

Strategjia e Kryeministrit: Kaosi si Shpëtim

Në qendër të këtij skenari qëndron vetë Kryeministri, i cili po funksionon si “strategu” i kësaj kundërofensive. Pse i intereson Edi Ramës që protesta të prodhojë tension?

Rama, si një politikan që ushqehet dhe funksionon përmes imazhit, këtë herë po goditet me të njëjtën armë. Është pikërisht imazhi qytetar dhe paqësor i “Revolucionit të Flamingove” ai që po e nxjerr zbuluar propagandën qeveritare. Prandaj, kryeministri nuk e zë gjumi, duke pritur momentin më të vogël të dobësisë për ta kthyer në debat kombëtar dhe për të zhvendosur fokusin nga dështimet e qeverisë së tij.

Rezistenca: Barrikada Qytetare

“Revolucioni i Flamingove” është tashmë një lëvizje shumë e madhe për t’u ndalur nga shashka të tilla artificiale. Efikasiteti i saj qëndron te rrënjët e saj: qetësia, festa dhe qytetaria.

Nëse protestuesit arrijnë të ruajnë këtë bazament dhe të qëndrojnë si një barrikadë unike përballë lojërave të infiltratëve, çdo sulm i pushtetit mbi “parullat” apo “gjuhën e urrejtjes” do të bjerë në ujë. Ajo që po e nervozon më shumë kryeministrin është pikërisht pamundësia për ta nxirë këtë protestë. Beteja e imazhit vazhdon, dhe për herë të parë, pushteti po e humb atë përballë qytetarëve të vet.