Luljeta Bozo: Banorët e prekur të financojnë, jo faji i shtetit që nuk kishin themele
Profesoresha e inxhinierisë, Luljeta Bozo ka kërkuar që financimi për rindërtimin e banesave të shkatërruara nga tërmeti i 26 nëntorit të bëhet nga Qeveria dhe nga ata individë të prekur që nuk kishin respektuar asnjë kod ndërtimi. Në mbledhjen e dytë të Komitetit Kombëtar të Rindërtimit, Bozo theksoi se nuk është faji i shtetit që disa prej individëve i kishin ndërtuar banesat e tyre pa themele.
Sa i përket planit të rindërtimit, Bozo propozoi që të merret në ngarkim nga njësitë vendore sepse Qeveria nuk mund të jetë e pranishme në çdo fshat të vendit.
“Duhet të kemi brenda javës pasqyrën e dëmtimeve në zonat rurale.
Duhet bërë një plan organizimi. Duhet ta bëjë njësia e administrimit, nuk mund ta bëjë Qeveria. Duhet të organizojë sesi duhet të fillojë puna. Po nuk pati afate dhe njerëz nuk bëhet asgjë, mund të flasim ne sa të duash këtu. Të evidentojnë në mënyrë që çdo gjë të bëhet e qartë dhe transparente.
Pastaj, mbi bazë të kësaj thuhet që ky është i pari në rrezik, pastaj i dyti dhe i treti.
Fondin do e mbulojë të gjithë shteti apo individi? Unë mendoj se duhet të japë edhe individi. Nuk ka faj shteti se e ka ndërtuar shtëpinë pa themel. Një pjesë të kësaj përgjegjësie financiare duhet të mbajë edhe personi që ka shkelur të gjitha rregullat”, deklaroi profesoresha Bozo.
Bozo ritheksoi se njësitë vendore duhet të vihen patjetër në lëvizje dhe se nuk duhet të pranojnë asnjë rindërtim pa projekt.
Në mbledhjen e dytë të Komitetit Kombëtar të Rindërtimit, Luljeta Bozo, profesoreshë e inxhinierisë, ka kërkuar që të hetohen të gjithë ata persona që kanë dëmtuar pallatet me heqjen e mureve. Sipas Bozos, jo çdo person mund të ndërhyjë si të dojë në ndryshimin e strukturës së një pallati.
“Për qytetet kam një shqetësim real sepse ka struktura që duken shumë mirë, por ka kaq shumë ndërhyrje sa unë nuk jam e sigurt se çfarë do të bëhet më vonë. Ndërhyrjet janë që nga heqja e mureve dhe arkitraut. Kanë ndërhyrë banorët. Këta që kanë bërë këtë dëm duhet të përgjigjen, secili nuk mund të bëjë si të dojë”, tha Bozo.
Edhe sa i përket atyre godinave të shembura nga tërmeti i 26 nëntorit, Luljeta Bozo kërkoi nga drejtësia që të veprojë sepse problemet e tyre ishin raportuar më parë.
Më tej, Bozo kërkoi nga administrata që të veprojë më shpejtë dhe larg burokracive, pasi momentin e konsideroi njësoj si “një kohë lufte”.
Keni një histori? Denonco anonimisht, identiteti juaj mbrohet.
Denonco
