MASHTRIMI/ Balluku premtoi kalim falas, protestuesit paguajnë sërish

Ministrja e Infrastrukturës dhe Energjisë, Belinda Balluku, deklaroi dje se “Rruga e Kombit” do të ishte pa pagesë për 24 orë në prag të protestës së orës 17:00 në Tiranë, në mbështetje të ish-krerëve të UÇK-së që ndodhen në Hagë.

Por realiteti në terren rezultoi ndryshe.

Udhëtarë nga Kosova dhe veriu i Shqipërisë, të cilët u nisën drejt kryeqytetit për të marrë pjesë në protestë, raportuan se në pikën e kalimit në Kalimash u detyruan të paguanin tarifën si në çdo ditë tjetër.

“Na e dhanë fjalën që do të kalonim falas për të shkuar në protestë, por në vend të nderit, na kërkuan pagesë si gjithmonë. Mashtrim i pastër!” – tha për Syri Kosova një qytetar nga Prishtina.

Ky zhvillim ka shkaktuar zemërim mes qytetarëve që e konsiderojnë vendimin një tjetër premtim të pambajtur dhe një përpjekje për të fituar pikë politike në një ditë me ndjeshmëri të lartë kombëtare.