Media shqiptare në zi, ndahet nga jeta gazetarja e njohur

Gazetaria shqiptare është në zi. Ka ndërruar jetë këtë të shtunë, në moshën 64-vjeçare, gazetarja e njohur Rezarta Reçi, pas një përballjeje të gjatë me një sëmundje të rëndë.

Rezarta Reçi ishte një nga figurat më të veçanta të ekranit shqiptar, e njohur për qasjen e saj të ndjeshme dhe reflektuese në gazetari. Për vite me radhë, ajo ishte ideatore dhe moderatore e emisionit “Arratia e peshkut të kuq” në News24, një program që u shndërrua në një hapësirë dialogu të thellë, rrëfimesh njerëzore dhe analizash me dimension social e shpirtëror.

Përtej televizionit, Reçi ka lënë gjurmë edhe në letërsinë publicistike. Ajo është autore e disa librave, ku ndërthurte intervista, rrëfime personale dhe përjetime nga jeta e saj profesionale, duke sjellë një pasqyrë intime të njeriut dhe shoqërisë.

Humbja e Rezarta Reçit lë pas një boshllëk në median shqiptare, por edhe një trashëgimi të çmuar profesionale dhe njerëzore, e cila do të kujtohet nga kolegët, lexuesit dhe teleshikuesit.