Ish-futbollisti i Flamurtarit, Agim Bubeqi, gjendet i pajetë në banesë

Ka ndërruar jetë Agim Bubeqi, ish-futbollisti i njohur i Flamurtarit të Vlorës dhe një prej emrave të spikatur të skuadrës vlonjate në periudhën e artë të futbollit shqiptar.

Bubeqi është gjetur pa shenja jete në apartamentin e tij. Sipas burimeve, dyshohet se ai kishte ndërruar jetë prej disa ditësh përpara se trupi i tij të gjendej në banesë.

Mungesa e tij për disa ditë ka alarmuar fqinjët, të cilët kanë njoftuar Policinë. Pas mbërritjes dhe kryerjes së kontrolleve në banesë, efektivët kanë gjetur trupin e pajetë të ish-futbollistit.

Agim Bubeqi ishte pjesë e Flamurtarit në vitet më të suksesshme të klubit vlonjat, duke u renditur mes futbollistëve që kontribuuan në periudhën kur skuadra shkroi disa prej faqeve më të rëndësishme të historisë së saj. Ai u shpall edhe “Mjeshtër Sporti” dhe u vlerësua si një prej sulmuesve më të mirë të viteve 1986 dhe 1987.

Bubeqi ishte pjesë e formacionit të Flamurtarit edhe në sezonin 1990–1991, kur skuadra vlonjate fitoi për herë të parë titullin kampion të Shqipërisë.

Lajmi për ndarjen e tij nga jeta ka prekur edhe ish-shokët e skuadrës, të cilët kanë kujtuar kontributin e tij në një prej periudhave më të lavdishme të Flamurtarit.