Mesazhi ndaj Yuri Kim që ‘trazoi’ Gledis Nanon

Një mesazh zanor me fjalë denigruese, në adresën e Instagramit të ambasadores së SHBA Yuri Kim, është bërë objekt hetimi nga Policia e Shtetit. Të dhënat dalin nga publikimi i email-eve të Gledis Nanos, ndërsa i riu thotë se nuk e dinte kujt po i shkruante. Në korrespondencat e Nanos gjenden foto të profilit të këngëtarit Arkimed Lusha dhe të Eljo M., përfshirë edhe dëshminë e këtij të fundit.

Mesazhet e publikuara nga Homeland Justice, përveç komunikimeve të ish-numrit një të Policisë së Shtetit Gledis Nano me agjencitë e huaja partnere, përmbajnë edhe komunikime me ambasadën amerikane në Tiranë.

Eljo M. është një i ri që ishte marrë në hetim nga policia, për shkak të një mesazhi zanor që kishte dërguar në adresën e ambasadores Yuri Kim në Instagram. Në email-in e Gledis Nanos zbardhet qëndrimi që ka mbajtur i riu një gushtin e vitit të kaluar, teksa është marrë në pyetje duke pretenduar mes të tjerave se nuk e dinte kujt i kishte shkruar por ishte nxitur nga statusi i reperit Arkimed Lusha në rrjetet sociale.

“Ditën e djeshme, datë 31 korrik, rreth orës 15:40 u futa në Instagram dhe pashë që këngëtari ‘Stresi’ (që quhet Arkimed Lusha), kishte bërë një postim duke shkruar që: Yuri Kim ka pështyrë popullin shqiptar. Ai na bënte thirrje që shajeni, ofendojeni. Unë 3 minuta më vonë kam bërë një mesazh zanor, i cili është me dy ndërprerje, ku kam sharë nga robt Yuri Kim dhe nga goca. E kam dërguar në faqen e ambasadores. Këtë veprim e bëra pa u menduar gjatë dhe vetë nuk e dija shumë qartë se kush ishte”, tha Eljo.M para hetuesve.

Në email-in e Nanos ndodhet edhe një foto e profilit të reperit në Instagram, foto e personit të marrë në pyetje si dhe mesazhi zanor që ky i fundit i ka dërguar ambasadores.

Hakerat kanë në duar sisteme të Policisë së Shtetit tashmë, ndërsa së fundmi publikuan më shumë se 1400 e-maile hyrëse dhe 1200 dalëse në adresë të ish-numrit një të Policisë.