Meta dhe Kryemadhi të pandehur nga SPAK – Avokati Logu: Vendim politik, jo ligjor

Ish-presidenti Ilir Meta dhe bashkëshortja e tij, Monika Kryemadhi, janë shpallur zyrtarisht të pandehur nga Prokuroria e Posaçme (SPAK), pas përfundimit të hetimeve mbi dy çështje të bujshme: lobimin në SHBA dhe aferën e njohur si CEZ-DIA.

Në një prononcim avokati dhe juristi i njohur Besard Logu ka reaguar me kritika të forta ndaj vendimit të SPAK, duke e cilësuar atë të pajustifikuar dhe të motivuar politikisht. Sipas tij, është e palogjikshme që një lider partie të merret në përgjegjësi penale për veprime të natyrës teknike dhe financiare, siç është lobimi ndërkombëtar.

“Nuk është funksioni i kryetarit të një partie të merret me deklarime financiare apo marrëdhënie kontraktuale. Këto janë përgjegjësi të sekretarit organizativ, drejtorit financiar apo përfaqësuesve ligjorë,” – thekson Logu.

Ai ngre pikëpyetje të mëdha edhe mbi kohëzgjatjen dhe kohëzimin e procedimit penal, duke sugjeruar se ky veprim i SPAK vjen në një moment kritik politik – menjëherë pas zgjedhjeve të 11 majit – për të zhvendosur vëmendjen nga akuzat e rënda për manipulim të procesit zgjedhor dhe përfshirjen e grupeve kriminale në votime.

“Në vend që të merremi me pretendimet e rënda për zgjedhjet, vëmendja orientohet te një çështje e disa viteve më parë. Mungon lidhja direkte e Metës me aktet konkrete që janë objekt hetimi,” – u shpreh Logu.

Juristi theksoi parimin e përgjegjësisë penale individuale dhe rrezikun që mbart aplikimi i një logjike kolektive për ndëshkimin e figurave politike.

“Kryetari i një partie është figurë përfaqësuese, jo administrator teknik. Nuk mund të mbahet penalisht përgjegjës për çdo kontratë, pagesë apo mosdeklarim që ndodh në strukturat e partisë,” – deklaroi ai.

Logu paralajmëroi se kjo qasje jo vetëm që cenon shtetin e së drejtës, por krijon një precedent të rrezikshëm: ndëshkimin e liderëve politikë për veprime që nuk i kanë kryer vetë dhe për të cilat mungon çdo provë e drejtpërdrejtë.

Hetimet ndaj Metës dhe Kryemadhit pritet të përshkallëzohen në muajt në vijim, ndërsa reagimet politike dhe ligjore do të jenë të pashmangshme.