Ministri i Brendshëm Taulant Balla, përmes një deklarate për mediat, deklaroi se do të ndryshohet ligji për sistemin e adresave. Balla theksoi se do të thellohet reforma për systemin e gjendjes civile.
Më tej, Balla shtoi se çdo qytetar e ka detyrim të tregojë se ku jeton.
“Do ndryshojmë ligjin për sistemin e adresave. Thellojmë reformën për sistemin e gjendjes civile. Biem dakord të gjithë që kemi revoluvion dixhital në shërbime, që ka sjellë kursime të parave dhe të kohës që ata harxhojnë për të marrë dokumentet e nevojshme.
I drejtohem me përulje çdo qytetari, që të njoftojë vendin ku banon ose vendin ku qëndron. Iu drejtohem edhe qytetarëve shqiptarë që jetojnë jashtë Shqipërisë, ne e bëjmë të detyrueshëm deklarimin e vendit të qëndrimit. Këtë qytetarët mund ta bëjnë online. Qytetarët që jetojnë jashtë Shqipërisë ta tregojnë në E-Albania se ku jetojnë. Mund ta tregojnë me një faturë uji apo dritash. Çdo qytetar e ka detyrim të tregojë se ku jeton”, u shpreh Balla.
Ministri i Brendshëm, Taulant Balla është pyetur në lidhje me bashkinë e Himarës dhe cili do të jetë në krye të bashkisë ndërkohë që kryetari i zgjedhur Fredi Beleri ndodhet në burg, dhe kryetari që ishte në detyrë Jorgo Goro ka dhënë sot dorëheqjen nga qelia e paraburgimit.
Balla u shpreh se rastet e krijimit të vakancave të krijuara në çfarëdo lloj forme, parashikohen në ligjin për organizimin e qeverisjes vendore.
Në lidhje me faktin se a do të jetë Vangjel Tavo ai që do të drejtojë këtë bashki, balla tha se qeveria do të zbatojë ligjin.
“Ligji për organizimin e qeverisjes vendore parashikon rastet e vakancës të krijuar në të gjitha format. Dorëheqja sapo ka ndodhur. Brenda 48 orësh prefekti njofton organet e qeverisjes ligjor. Qeveria do zbatojë ligjin pikë për pikë”, tha ai.
