Ministri Hoxha jep emrat: Kemi 12 drejtues të rinj në qarqe, dolën nga konkursi

Ministri i Brendshëm Ervin Hoxha ka folur sot për reformën në polici dhe emrat e rinj të Drejtorive të Policisë.

“Sot përmbyllet një tjetër fazë bazuar në reformën më të re për emërimin e drejtuesve të policisë në qarqe. Kemi 12 drejtues të rinj të dalë nga ponkursi ku morën pjesë 43 konkurrentë”.

Dymbëdhjetë drejtoritë e Policisë në Qarqe do të kenë nga sot drejtues të rinj. Ministri i Brendshëm Ervin Hoxha prezantoi këtë të enjte 12 drejtorët e rinj, në një dalje për mediat.

Ata janë:

1. Elton Alushi – Drejtor i Policisë Tiranës
2. Vilson Bala – Drejtor i Policisë Durrës
3. Skënder Hitaj – Drejtor i Policisë Fier
4. Fatmir Hoxha – Drejtor i Policisë Elbasan
5. Fatmir Lleshaj – Drejtor i Policisë Shkodër
6. Erion Ahmeti – Drejtor i Policisë Korçë
7. Elidon Çela – Drejtor i Policisë Vlorë
8. Altin Mena – Drejtor i Policisë Lezhë
9. Altin Merizaj – Drejtor i Policisë Gjirokastër
10. Luigj Vathi – Drejtor i Policisë Berat
11. Gentian Berberi – Drejtor i Policisë Kukës
12. Artion Duka – Drejtor i Policisë Dibër

Gjatë fjalës së tij, ministri Hoxha ka kërkuar që drejtuesit e rinj të Policisë së Shtetit duhet të kenë reagim të shpejtë ndaj ngjarjeve kriminale. Hoxha shtoi se masakra e Shkodrës me 4 viktima duhet të zbardhet sa më shpejt dhe autorët të vendosen para drejtësisë. Më tej, ministri tha se duhet të marrin fund shqetësimet e qytetarëve që ngacmohen nga punonjës policie të papërgjegjshëm për riparimin e avllisë apo të shkallëve.

Ndryshimet në kupolën e Policisë erdhën pasi në postin e ministrit të Brendshëm Taulant Balla u zëvendësua nga Ervin Hoxha. Ky i fundit urdhëroi çeljen e një konkursi për zgjedhjen e kreut të ri të Policisë së Shtetit, më pas nisi procedura për zgjedhjen e drejtuesve të 12 Qarqeve dhe shefave të komisariateve. Teksa në krye të Policisë së Shtetit u zgjodh Ilir Proda, këtë të enjte u mësuan edhe drejtuesit e qarqeve. Në vijim, do të zbardhen edhe emrat e shefave të rinj të komisariateve.

Konkursi i Policisë është kritikuar si fasadë, kryesisht nga opozita.