Pjesë nga dosja hetimore

Prokuroria e Posaçme (SPAK) ka lëshuar urdhër arresti për Jetmir Pepën, i njohur si “Mir Pepa”, një person me precedentë penalë që prej muajsh rezulton në kërkim. Ndërsa në publik është shfaqur si biznesmen dhe figurë e lidhur me jetën e natës, dosja hetimore sjell një panoramë krejt tjetër, dhe në qendër të saj qëndrojnë transkriptet e bisedave mes tij dhe motrave Berisha.

Këto komunikime, të zhvilluara në një gjuhë të drejtpërdrejtë dhe shpesh të ashpër, zbulojnë tensione të forta financiare, borxhe dhe përplasje për para.

“Na duhen lekë… s’kemi ba punë”

Në një nga fragmentet më domethënëse, del në pah presioni i vazhdueshëm për para:

“Sa lek jeni borgj… dun lek prap… na duhen lekt… ska lek se s’kena ba pun!!”

Biseda tregon qartë një situatë të rënduar ekonomike, ku mungesa e të ardhurave dhe borxhet janë kthyer në shqetësimin kryesor mes palëve.

Pagesa konkrete dhe përfshirja në “punë”

Në komunikime përmenden edhe shuma konkrete që duhen siguruar:

“300 euro duhen me marr punën… duhen 300e me ja dhan Pjerinit…”

Këto fragmente sugjerojnë tentativa për të hyrë në aktivitete që kërkojnë pagesa paraprake, duke ngritur pikëpyetje mbi natyrën e këtyre “punëve”.

Prona peng dhe mungesë likuiditeti

Një tjetër pjesë e rëndësishme lidhet me asetet:

“Token e kena peng 100 hektar… nuk i ka lekt… duhen lekt tani…”

Edhe pse përmenden pasuri të konsiderueshme, si toka në sipërfaqe të madhe, mungesa e parave të gatshme mbetet problem kyç.

Përplasje të hapura: “paguhen veç bodyguard-at”

Transkriptet nxjerrin në pah edhe konfliktin e drejtpërdrejtë mes palëve:

“Ju keni menjen veç me pagu lekt gjysma për ato badigardat… duhet me i ba vet punët…”

Kjo tregon për akuza të ndërsjella dhe pakënaqësi mbi mënyrën se si menaxhohen paratë dhe prioritetet.

“Në hall për lekë… duke kërkuar borxh”

Në vijim, situata përshkruhet edhe më qartë:

“Kan ra në hall për lek… tu shku tu marr pun në çdo ven… tu kërku lek borxh…”

Një tablo e një marrëdhënieje të tensionuar, ku palët përpiqen të sigurojnë të ardhura në çdo mënyrë, shpesh pa stabilitet.

Nga lidhjet personale te konfliktet publike

Fakti që këto biseda zhvillohen mes motrave Berisha dhe “Mir Pepës” i jep një dimension tjetër dosjes, duke e lidhur atë jo vetëm me çështje financiare, por edhe me marrëdhënie personale që më pas kanë shpërthyer në konflikte publike.

Pepa është përfolur si ish-partner i një prej motrave Berisha, çka e vendosi në qendër të një përplasjeje të bujshme me blogeren Klea Prenga, një episod që tërhoqi vëmendje të madhe mediatike.

E shkuara dhe kërkimi aktual

Pepa ka një të shkuar të njohur për autoritetet. Ai ndryshoi mbiemrin vite më parë, duke marrë atë të ish-partneres së tij, Xhulia Marashi, motra e modeles së njohur Oriola Marashi.

Në korrik 2021 ai i shpëtoi një atentati në Tiranë, ndërsa prej janarit 2025 rezulton në kërkim edhe për një incident të rëndë te Parku Olimpik, ku dyshohet se qëlloi me armë gjatë një koncerti.

Klubi luksoz në Shëngjin

Pavarësisht krizës financiare që del nga transkriptet, në emër të Pepës rezultojnë edhe pasuri të konsiderueshme. Mes tyre është edhe një klub luksoz në bregdetin e Shëngjin, i njohur si Soluna.

Ky lokal, i pozicionuar pranë detit dhe mjaft i frekuentuar gjatë sezonit veror, është një nga pikat më të njohura të jetës së natës në zonë, ku mblidhen qindra të rinj çdo sezon turistik.

Kontrasti: luks jashtë, krizë brenda

Ndërsa në publik projektohet një stil jetese luksoz dhe lidhje me botën e showbiz-it, transkriptet tregojnë një realitet tjetër: borxhe, mungesë likuiditeti dhe përplasje të vazhdueshme për para.

Në fund, janë pikërisht këto biseda që japin një pasqyrë të drejtpërdrejtë të një marrëdhënieje të tensionuar, ku financat, interesat dhe konfliktet personale ndërthuren në mënyrë të fortë.