A u manipulua marshimi për të lodhur protestuesit?

Protesta e djeshme në Tiranë mori një kthesë të pazakontë, pasi turma e protestuesve u zhvendos nga qendra e kryeqytetit drejt autostradës Tiranë–Durrës dhe më pas në aksin që të çon drejt Rinasit.

Marshimi, që zgjati rreth pesë orë, shkaktoi bllokime të gjata trafiku dhe tensione të lehta me forcat e policisë pranë rrugës së aeroportit. Lëvizja e papritur e protestuesve ka ngjallur reagime të ndryshme dhe ka ngritur pikëpyetje mbi mënyrën e organizimit të itinerarit.

Në protesta të kësaj natyre, zgjedhja e drejtimit të marshimit konsiderohet thelbësore, pasi ndikon drejtpërdrejt në impaktin publik dhe politik të tubimit, por edhe në qëndrueshmërinë e pjesëmarrësve.

Organizatorët kanë hedhur dyshime për praninë e personave të infiltruar në turmë, të cilët, sipas tyre, mund të kenë orientuar protestuesit drejt Rinasit. Disa pjesëmarrës pretendojnë se u drejtuan nga persona të paidentifikuar, me qëllim lodhjen e tyre dhe shpërndarjen graduale të protestës.

Sipas të dhënave, rreth orës 00:26 pas mesnate, protestuesit mbërritën te mbikalimi i Rinasit dhe më pas vijuan drejt zonës së aeroportit, ku qëndruan deri në orën 02:00 të mëngjesit.

Ndërkohë, forcat e policisë vendosën kordon sigurie për të mos lejuar afrimin e protestuesve në aeroportin “Nënë Tereza”. Autoritetet u bënë thirrje qytetarëve të mos bllokonin rrugën, duke e cilësuar një veprim të paligjshëm.

Pas disa minutash rezistence, protestuesit u tërhoqën, ndërsa e gjithë ngjarja u mbyll pa incidente të rënda apo përplasje fizike mes policisë dhe qytetarëve.