Momenti kur 23-vjeçari tentoi grabitjen e “Exchange-it” në Tiranë

Janë bërë publike pamjet nga tentativa e grabitjes së një pike këmbimi valutor në zonën e Shkozës, në Tiranë, ku protagonist është 23-vjeçari Kledi Ymeri.

Sipas të dhënave, i riu ka hyrë në ambientet e exchange-it gjatë paradites dhe ka tentuar të marrë para duke kërcënuar me një armë që më vonë rezultoi të ishte pistoletë lodër. E gjithë skena është regjistruar nga kamerat e sigurisë, të cilat dokumentojnë momentin e hyrjes dhe veprimet e tij brenda subjektit.

Menjëherë pas njoftimit, shërbimet e Policisë kanë reaguar duke bërë të mundur identifikimin dhe arrestimin e autorit në një kohë të shkurtër. Gjatë kontrollit në zonën përreth, uniformat blu kanë gjetur dhe sekuestruar edhe mjetin e përdorur në tentativën e grabitjes, i cili u mor në cilësinë e provës materiale.

Autoritetet bëjnë me dije se materialet procedurale i janë referuar Prokurorisë, ndërsa hetimet vijojnë për të sqaruar plotësisht rrethanat e kësaj ngjarjeje dhe për të verifikuar nëse i riu ka qenë i përfshirë në episode të tjera të ngjashme.