Ndërpritet seanca e Ergys Agasit, zbardhet arsyeja

Ergys Agasi ka mbërritur këtë mëngjes në ambientet e Gjykatës së Posaçme kundër Korrupsionit dhe Krimit të Organizuar, ku do të zhvillohet seanca për vlerësimin e masës së sigurisë ndaj tij.

Agasi është sjellë në gjykatë nën masa të shumta sigurie, ndërsa më herët në GJKKO kishte mbërritur edhe avokati i tij, Maks Haxhia.

Seanca është ndërprerë përkohësisht, pasi mbrojtja ka kërkuar kohë për t’u njohur me materialet e dosjes. Seanca pritet të rinisë në orën 12:00.

Ndaj Agasit ishte caktuar më herët masa e sigurisë “arrest në burg” në mungesë, ndërsa ai ishte shpallur në kërkim për muaj me radhë. Ai u arrestua më 26 gusht në zonën e Plepave në Durrës, pas një operacioni të Policisë së Shtetit dhe BKH-së.

Në momentin e arrestimit, Agasi shoqërohej nga ish-punonjësi i Policisë së Shtetit, Uljan Shpataraku, i cili u arrestua në flagrancë dhe akuzohet për “Përkrahjen e autorit të krimit”, sipas SPAK.

Agasi po hetohet në kuadër të dosjes së AKSHI-t për një sërë veprash penale, ndërsa mbrojtja e tij ka deklaruar më herët se kërkon të njihet me dosjen hetimore dhe ka kundërshtuar akuzat.

Seanca e sotme pritet të përcaktojë vijimin e masës së sigurisë ndaj biznesmenit.