Ndërron jetë avokati Saimir Vishaj

Avokati Saimir Vishaj është ndarë nga jeta, pasi prej disa kohësh ndodhej në gjendje të rëndë shëndetësore. Ai ishte shtruar me urgjencë në Spitalin e Traumës në Tiranë, ku mjekët po përpiqeshin ta mbanin në jetë.

Vishaj ishte dërguar në spital pas dyshimeve se kishte pësuar një rënie nga shkallët. Për shkak të gjendjes së rënduar, ai ishte intubuar nga stafi mjekësor, ndërsa situata e tij shëndetësore ishte konsideruar kritike.

Avokati nga Vlora kishte folur edhe më herët për betejën e tij me shëndetin. Në gusht të vitit 2025, kur ishte 60 vjeç, ai kishte treguar publikisht se kishte kaluar një sëmundje të rëndë, e cila e kishte çuar për një periudhë në gjendje kome dhe kishte kërkuar intubimin e tij.

Lajmi për ndarjen e tij nga jeta shënon fundin e një beteje të vështirë shëndetësore, ndërsa rrethanat e plota të ngjarjes që parapriu shtrimin e tij në spital mbeten për t’u sqaruar.