Ndryshime në Policinë e Shtetit, zbardhen lëvizjet e fundit

Ndryshimet në Policinë e Shtetit kanë nisur menjëherë pas marrjes së detyrës nga ministrja e re e Brendshme, Albana Koçiu, duke sinjalizuar një valë të re riorganizimi brenda strukturave të sigurisë.

Gazetari Xhuljan Ferzaj raporton se Edvin Ndreu është emëruar në detyrën e Drejtorit të Drejtorisë Vendore për Kufirin dhe Migracionin në qarkun Tiranë. Një pozicion ky me rëndësi strategjike, në kushtet kur fluksi i migracionit dhe çështjet e sigurisë kufitare vijojnë të jenë prioritete të larta për institucionet e rendit.

Ndërkohë, një tjetër lëvizje është ajo e Silvana Alimadhit, e cila transferohet në Drejtorinë e Përgjithshme të Policisë së Shtetit dhe emërohet Shefe e Sektorit për Hetimin e Trafiqeve të Paligjshme, një sektor kyç në luftën kundër krimit të organizuar dhe trafikut ndërkombëtar.

Këto janë vetëm disa nga ndryshimet që priten të pasojnë në vijim, ndërsa ministrja e re pritet të vendosë një ritëm të ri në reformimin e Policisë së Shtetit dhe forcimin e kapaciteteve operacionale në terren.