Ndryshime të forta në SPAK, Klodian Braho miraton strukturën e re

Kryeprokurori i ri i Prokurorisë së Posaçme, Klodian Braho, ka miratuar strukturën e re organizative të SPAK, duke përcaktuar edhe ndarjen e përgjegjësive mes prokurorëve që do të drejtojnë sektorët kyç të institucionit.

Sipas vendimit të firmosur prej tij, prokurori Altin Dumani do të ketë në ngarkim drejtimin e seksionit për marrëdhëniet me jashtë, duke u fokusuar në koordinimin dhe forcimin e bashkëpunimit ndërkombëtar me institucionet homologe.

Ndërkohë, drejtimin e seksionit për hetimin e korrupsionit do ta marrë prokurorja Dorina Bejko, ndërsa seksioni kundër krimit të organizuar do të drejtohet nga prokurori Vladimir Mara.

Riorganizimi i ri i Prokurorisë së Posaçme synon rritjen e eficiencës në trajtimin e çështjeve komplekse, përshpejtimin e hetimeve dhe forcimin e luftës ndaj korrupsionit dhe krimit të organizuar në nivelet më të larta.