Nesër protesta e PD, ja kush janë rrugët që do të bllokohen

Policia e Tiranës ka bërë publike planin e masave për garantimin e rendit dhe sigurisë gjatë protestës së paralajmëruar nga Partia Demokratike, e cila pritet të zhvillohet mbrëmjen e 8 majit në bulevardin “Dëshmorët e Kombit”, përballë godinës së Kryeministrisë.

Në funksion të mbarëvajtjes së tubimit, autoritetet kanë vendosur kufizime të përkohshme në disa nga akset kryesore të kryeqytetit, duke paralajmëruar bllokime të plota të qarkullimit dhe ndalim parkimi në zona kyçe.

Sipas planit të shpallur, duke nisur nga ora 23:45 e datës 7 maj, do të ndalohet qarkullimi dhe parkimi i automjeteve në segmentin e bulevardit “Dëshmorët e Kombit” që shtrihet nga “Ura e Dajtit” deri në rrugën “Ismail Qemali”. Ky kufizim do të vijojë deri në përfundim të protestës.

Ndërkohë, gjatë ditës së protestës, nga ora 15:00 e datës 8 maj e në vijim, do të ketë bllokim të plotë të lëvizjes së automjeteve në të njëjtin bulevard, nga kryqëzimi pranë Ministrisë së Brendshme deri në sheshin “Nënë Tereza”. Kufizime do të zbatohen gjithashtu edhe në disa rrugë lidhëse, përfshirë “Ukraina e Lirë”, “Papa Gjon Pali II” dhe “Ismail Qemali”.

Autoritetet theksojnë se këto masa janë marrë në përputhje me legjislacionin në fuqi për tubimet publike dhe synojnë të garantojnë zhvillimin e protestës pa incidente, si dhe sigurinë e qytetarëve.

Policia u ka bërë thirrje organizatorëve që të respektojnë orarin dhe vendin e përcaktuar për tubimin, ndërsa qytetarëve u kërkohet mirëkuptim për kufizimet e përkohshme në qarkullim. Njëkohësisht, është apeluar që çdo person të shmangë përfshirjen në veprime të paligjshme që mund të cenojnë rendin dhe sigurinë publike.

Njoftimi i policisë:

DVP Tiranë

Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, më datë 08.05.2026, në orën 19:00, në bulevardin “Dëshmorët e Kombit”, para godinës së Kryeministrisë.

Në bazë të ligjit “Për tubimet”, Policia e Tiranës ka marrë masat me qëllim garantimin e mbarëvajtjes së tubimit në vendin dhe afatin kohor të kërkuar.

Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore, konkretisht:
nga ora 23:45 e datës 07.05.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;
nga ora 15:00 e datës 08.05.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Policia e Tiranës apelon për organizatorët e tubimit për respektimin e afatit kohor dhe vendit ku do të zhvillohet tubimi, si dhe kërkon mirëkuptimin e qytetarëve për kufizimin e lëvizjes me automjete.

Gjithashtu, apelon që të distancohen në rast se gjenden përballë veprimeve të kundërligjshme që cenojnë rendin dhe sigurinë publike.