Nga parkimi dysh te shpifja, miratohen ndryshimet në Kodin Penal

Në orët e para të mëngjesit, Kuvendi i Shqipërisë i dha dritën jeshile një pakete të gjerë ndryshimesh ligjore, ku në qendër ishte edhe rishikimi i Kodit Penal, së bashku me disa projektligje të konsideruara kyçe. Ndryshimet në Kodin Penal u miratuan me 85 vota pro, të siguruara nga mazhoranca, dhe parashikojnë masa ndëshkuese më të ashpra për një sërë shkeljesh, përfshirë vendosjen e gjobave dhe dënim deri në një vit burg për parkimin dyfish në rrugë.

Gjatë prezantimit të paketës, ministri i Drejtësisë, Besfort Lamallari, theksoi se këto ndërhyrje ligjore janë pjesë e procesit të integrimit europian, duke synuar afrimin e mëtejshëm të legjislacionit shqiptar me standardet dhe praktikat e Bashkimit Europian, në masën më të madhe të mundshme.

Dy nga ndryshimet që kanë ngjallur më shumë debat në opinionin publik dhe në media lidhen, nga njëra anë, me ashpërsimin e sanksioneve penale për parkimin dyfish dhe, nga ana tjetër, me dekriminalizimin e shpifjes për gazetarët. Sipas ndryshimeve të miratuara, gazetarët përjashtohen nga procedimi penal për veprën penale të shpifjes, duke u garantuar imunitet vetëm në këtë kategori.

Në të njëjtën seancë, Kuvendi miratoi gjithashtu me 85 vota ndryshimet ligjore që kanë të bëjnë me statusin e gjyqtarëve dhe prokurorëve, si edhe projektligjin “Për organet e qeverisjes në drejtësi”. Me votat e shumicës socialiste u miratua edhe ligji për organizimin e komisioneve hetimore, si dhe ai që rregullon fushën e mediave audiovizive.

Përveç këtyre, deputetët votuan edhe një sërë nismash të tjera ligjore, mes tyre akti normativ për buxhetin e vitit 2025, ndryshime në ligjin për duhanin, si dhe ashpërsimin e dënimeve për ndërtimet pa leje dhe zjarrvëniet.

Gjatë seancës plenare u miratuan konkretisht:

• Akti normativ për ndryshimet në ligjin e Buxhetit 2025

• Projektligji për bashkëpunimin strategjik

• Projektligji “Shqipëria në Traktatin për Pronësinë Intelektuale”

• Projektligji “Për tregtinë e pronësisë intelektuale”

• Projektligji “Për shërbimet e agjencive të udhëtimit”

• Projektligji “Për tregtinë e paligjshme të duhanit”

• Projektligji “Për ndryshimin e Kodit Penal”

• Projektligji “Për statusin e gjyqtarëve dhe prokurorëve”

• Projektligji “Për organet e qeverisjes në drejtësi”

• Projektligji “Për dhunën ndaj grave dhe dhunën në familje”

• Projektligji “Për lobimin në Republikën e Shqipërisë”

• Projektligji “Për importin dhe eksportin e armëve”

• Projektligji “Për organizimin e Komisioneve Hetimore të Kuvendit”

• Projektligji “Për Mediat Audiovizive”