“Një eurodeputet i burgosur në Fier”, Artan Hoxha për Belerin: S’jam i bindur nëse duhet të rrijë në burg!

Gazetari investigativ Artan Hoxha deklaroi se zgjedhjen e Fredi Belerit si eurodeputet e kishte parashikuar në emisionet e mëparshme.

I ftuar në emisionin “Të Paekspozuarit”, Hoxha tha se një njeri që është në burgun e Fierit, që priste të bëhej kryetar bashkie në Himarë, tani është bërë eurodeputet dhe burgu i Fierit sot mban një eurodeputet brenda.

“Thashë se sondazhet e nxirrnin që ky e kapte shifrën e 200 mijë votuesve. Nga 21 eurodeputetë gjithsej që ka Greqia, 7 ka marrë “Demokracia e Re” dhe Beleri është i 4-ti më i votuar me 237 mijë vota. Ky është vërtet një nonsens.

Një njeri që është në burgun e Fierit, që priste të bëhej kryetar bashkie në Himarë, tani është bërë eurodeputet. Pra, burgu i Fierit sot mban një eurodeputet brenda, por ky nuk është rasti i vetëm për këto zgjedhje.

Problemi që kemi ne sot, që ka Shqipëria, është që e mban në burg. Pra, ne sot në Shqipëri kemi një të dënuar me vendim të shkallës së parë për vjedhje votash. E dëgjova Sejaminin që tha e futën kurth, por nuk ka kurth në gjykatë. Në gjykatë ka, o është vepër penale, o s’është vepër penale.

Politikanët e Shqipërisë e presin këtë çështje. Kjo është një diskutim politik. Unë nuk jam i bindur tani nëse ky duhet të rrijë në burg. Në burg ky është në një vend tjetër, ndërkohë votat i ka marrë në Greqi. Ky është në burgun e Shqipërisë. Ai është qytetar grek dhe qytetar shqiptar. E dytë e punës, Gjykata Kushtetuese duhet të shprehet, dhe e treta dhe më kryesore, Shqipëria nuk është vend anëtar i BE-së”, tha Hoxha.