Nuk ndalet revolta, digjen kosha dhe bllokohet trafiku

Protesta studentore në Tiranë ka vijuar edhe në orët e mbrëmjes, duke u zhvendosur në disa pika të kryeqytetit dhe duke shkaktuar incidente të reja. Në zonën e “9-katësheve”, protestuesit kanë djegur kosha mbeturinash në mes të rrugës, duke krijuar një tjetër vatër tensioni.

Pas rreth shtatë orësh tubim, situata vijon të jetë e paqëndrueshme, me grupe protestuesish që lëvizin në akse të ndryshme, përplasje me forcat e rendit dhe vështirësi të mëdha në qarkullimin e automjeteve.

Nga “9-katëshet” te bulevardi “Zogu I”

Pasi protesta nisi rreth orës 14:00 pranë Ministrisë së Arsimit, ku u regjistruan përplasje me policinë, zhvillimet u shtrinë në disa zona të tjera të Tiranës.

Një grup protestuesish hyri më herët në ambientet e Bashkisë së Tiranës, ku u raportuan thyerje xhamash dhe hedhje flakadanësh. Më pas, pjesëmarrësit u ndanë në grupe dhe vijuan lëvizjen në pika të ndryshme të kryeqytetit.

Tensionet u shfaqën edhe në bulevardin “Zogu I”, ku protestuesit hodhën fishekzjarrë. Ndërkohë, në zonën e Selvisë u krijuan vështirësi në qarkullim, me disa automjete që u detyruan të lëviznin në kundërvajtje.

Thyejnë stolin prej mermeri pranë Sheshit Skënderbej

Incidente janë shënuar edhe në hyrje të Sheshit Skënderbej. Disa protestues kanë dëmtuar një stol prej mermeri, duke e ndarë në dy pjesë.

Sipas pamjeve të raportuara nga zona, një pjesë e stol-it është ngritur dhe është hedhur drejt rrugës ku qarkullojnë automjetet, duke shtuar rrezikun për drejtuesit e mjeteve dhe kalimtarët.

Ndërsa protesta vijon në disa akse të kryeqytetit, djegia e koshave, hedhja e fishekzjarrëve dhe dëmtimi i pronës publike janë bërë pjesë e episodeve të regjistruara gjatë mbrëmjes.

Përhapja e grupeve të protestuesve në zona të ndryshme ka vështirësuar menaxhimin e situatës dhe ka sjellë bllokime të trafikut. Protesta, e nisur në orët e mesditës, vijon të shoqërohet me tensione dhe incidente në Tiranë.