OBT: Shqipëria, e para në Europë dhe e dyta në botë për rritjen e turistëve të huaj

Organizata Botërore e Turizmit e ka renditur Shqipërinë në vendin e dytë në botë, dhe në vendin e parë në Europë sa i përket numrit të turistëve.

Në “Barometrin e Turizmit Botëror”, publikuar me të dhënat e sektorit të turizmit në nivel global nga janari në korrik të vitit 2022, OBT konfirmon se në vendin tonë kanë ardhur 19% turistë më shumë se në vitin 2019.

Gjithashtu, sa i përket të ardhurave të gjeneruara prej turistëve të huaj, Shqipëria rënditet në vend të katër, me një rritje prej 32% krahasuar me të ardhurat e vitit 2019.

Në periudhën janar-gusht, Shqipëria numëroi mbi 5,6 milionë vizitorë të huaj, rreth 800 mijë më shumë se viti 2019, teksa vizitorët në zonat e mbrojtura (3,3 milionë në tetë muajt e parë të vitit) dhe preferenca e turistëve të huaj për rajonin e veriut (41 %) tregojnë për një diversifikim të ofertës turistike dhe zgjatje të sezonit.

Ndërsa pesha e turizmit në Prodhimin e Brendshëm Bruto vlerësohet të jetë mbi 17 %.

Sipas Barometrit të botuar rishtazi, në nivel global flukset ndërkombëtare të turistëve pothuajse u trefishuan nga janari deri në korrik 2022 (+172%) krahasuar me të njëjtën periudhë të vitit 2021, por sektori mbetet ende në 60 % të nivelit të vitit 2019, pasi shumë vende po hasin vështirësi të rikuperojnë trendet.