Paralajmërimi i Agron Shehajt: SPAK do trokasë në Kryeministri!

Kryetari i Partisë “Mundësia”, Agron Shehaj, ka deklaruar se kryeministri Edi Rama është i rrezikuar nga hetimet që po zhvillon SPAK për dosjet e mëdha, duke theksuar se në disa prej tyre, sipas tij, Rama del si figurë kyçe në vendimmarrjen për tenderat.

Në vlerësimin e Shehajt, mosshkuarja e hetimeve deri te kryeministri do të cënonte rëndë besueshmërinë e Prokurorisë së Posaçme dhe gjithë sistemit të drejtësisë.

“Rama, absolutisht është i rrezikuar. Ajo që përmendi Klodi në përgjimet ku janë hetuar, sidomos Belinda Balluku, del shprehimisht emri i Ramës. Në rastin e tunelit të Llogarasë, vetë ajo thotë prit të marr leje nga ai dhe përdor një fjalë të ndyrë, ndaj atij i cili guxon të më kërcënojë.

Aty nuk përmendet me emër, por përmendet kur flet me Evis Berberin ku i thotë më tha takova një biznesmen që më tha se e ka mbyllur me Ramën.

Nga ana tjetër, gjithçka që po ndodh në rrethin e ngushtë të Ramës, nuk mund të injorojmë arrestimet në AKSH dhe dosjen e AKSHI, ku drejtoresha e AKSHI, praktikisht ka qenë një njeri shumë i besuar i Edi Ramës, që askush nuk i përmendte emrin. Kur i përmenda emrin deputetët e mazhorancës ngrinë. Ajo ka qenë 13 vite në krye të AKSHI. Të gjithë tenderat, edhe para rrëmbimit kishin të bënin me tendera korruptiv.

Kur shohim që njerëzit e rrethit të ngushtë të Ramës merren të pandehur, është e paimagjinueshme që drejtësia të mos shkojë te Rama. Nuk ka të bëjë me një zhgënjim, por me besueshmërinë e sistemit të drejtësisë. Të mos shkosh te Rama, do të thotë të hedhësh poshtë besueshmërinë që ke fituar”, tha Shehaj i ftuar në emisionin “Të Paekspozuarit”.