PD gati për zgjedhjet lokale , mbështet Florjan Binajn në Tiranë

Partia Demokratike ka zyrtarizuar kandidatët e saj për zgjedhjet e pjesshme lokale që do të zhvillohen më 9 nëntor në gjashtë bashki të vendit: Tiranë, Vlorë, Berat, Mat, Cërrik dhe Tepelenë.

Në kryeqytet, opozita ka vendosur të mos garojë me një kandidat të saj, por të mbështesë kandidatin e pavarur Florjan Binaj, i cili është bërë i njohur për qëndrimet e tij kritike ndaj pushtetit dhe përfshirjen aktive në protestat qytetare.

Në Tepelenë, PD ka përzgjedhur Gabriel Gumën, 26-vjeçar me profesion sipërmarrës, i cili do të përballet me kandidatin e PS-së, ish-komandantin e Gardës së Republikës Gramoz Sako.

Në Vlorë, opozita ka zgjedhur të mbështesë Dionis Sotën, kandidat i pavarur që ka shpallur vizionin e tij për një “Vlorë Evropiane për të gjithë”.

Për Bashkinë e Matit, kandidati i PD-së është Eduart Brahilika, avokat në profesion, i cili do të përballet me socialistin Altin Bojni.

Në Cërrik, PD do të përfaqësohet nga Amarildo Hoxha, mjek me profesion, që do të garojë përballë Florenc Dokës të PS-së. Kjo garë vjen pas largimit të Andis Sallës, i cili mori detyrën e ministrit të Bujqësisë dhe Zhvillimit Rural.

Ndërkohë, në Berat, opozita ka zgjedhur kandidatin Pavlo Shkarpa.

Tre nga bashkitë ku zhvillohen zgjedhjet – Berat, Tepelenë dhe Mat – mbetën pa kryetarë pas zgjedhjeve të 11 majit, pasi drejtuesit e tyre socialistë u zgjodhën deputetë. Në Vlorë, Ermal Dredha dha dorëheqjen si kryebashkiak, ndërsa në Cërrik, Andis Salla u transferua në qeveri.

Ndërkohë, për Bashkinë e Tiranës, zhvillimi i zgjedhjeve mbetet pezull deri në vendimin e Gjykatës Kushtetuese, pas ankimimit të Erion Veliajt lidhur me shkarkimin e tij nga detyra.