PD në kolaps, deficitet intelektuale që po e shkatërrojnë partinë

Partia Demokratike po përjeton një periudhë të vështirë brenda strukturave të saj drejtuese. Zhvillimet e fundit kanë nxjerrë në pah mungesën e koordinimit dhe konsensusit mes anëtarëve të grupit parlamentar.

Gazetari Klodian Tomorri vë në dukje se ku ka “përfunduar” kjo forcë politike, duke e krahasuar Partinë Demokratike të mëparshme, me figura si Ridvan Bode, Majlinda Bregu e Genc Ruli, me PD-në e sotme, ku sipas tij anëtarët e grupit parlamentar fajësojnë kryeministrin për vendimet që ata vetë marrin.

Postimi i plotë i Klodian Tomorrit:

Problemi është se kaluam nga PD-ja e Ridvan Bodes, Genc Rulit, Majlinda Bregut, Flor Mimes, Selami Xhepes etj. etj., tek PD-ja ku gjithë grupi Parlamentar thotë na gënjeu Rama për të firmosur.

Ajo që i tha Cim Peka Berishës për diferencën e madhe intelektuale nuk është e vërtetë vetëm për dyshin, por është e vërtetë kapilarisht për të gjithë strukturën drejtuese të Partisë.

Dhe deficiti intelektual në eliten e PD-së është bërë strukturor. Pra nuk është thjesht që ka ca kokrra që edhe s’kuptojnë shumë, por që sprishin punë në panoramën e madhe.

Deficitet strukturore janë shumë të vështira për t’u çrrënjosur. Në çdo fushë. Nga ajo fiskale deri tek dija.

Unë nuk e dija, por një mik po më thoshte dje që Ledi Bianku qenka afër PD-së. Tani a kishte ky vend kandidat më të përsosur se Ledi Bianku për Avokat i Popullit? Po nuk ka. Nuk e gjen dot.

Gjyqtar në Strasburg, profesionist i jashtëzakonshëm, pa asnjë cen në integritet.

Të kesh një aset kështu dhe të bësh atë pacavuren e firmave që bënë këta do të thotë që suficiti i budallëkut në PD është në nivele vetëvrasëse.