Përfundoi në SPAK, Balluku i ‘zë derën’ Ramës

Vetëm pak orë pas paraqitjes në Prokurorinë e Posaçme, ku u njoh zyrtarisht me akuzat ndaj saj, zëvendëskryeministrja dhe ministrja e Infrastrukturës dhe Energjisë, Belinda Balluku, është parë të hyjë në ambientet e Kryeministrisë.

Mësohet se takimi me kryeministrin Edi Rama ka qenë i papritur dhe me dyer të mbyllura, ndërsa ende nuk dihet nëse është diskutuar për zhvillimet e fundit në hetimin e SPAK-ut.

Më herët gjatë ditës, Prokuroria e Posaçme kundër Korrupsionit dhe Krimit të Organizuar njoftoi se Balluku është marrë zyrtarisht e pandehur në lidhje me tenderin e Tunelit të Llogarasë, një projekt me vlerë të lartë ekonomike që prej kohësh ka qenë objekt hetimi.

Në njoftimin zyrtar të SPAK-ut thuhet se hetimet po zhvillohen në kuadër të procedimit penal nr.136 të vitit 2025, të bashkuar me dy procedime të tjera të vitit 2024, për veprën penale “Shkelje e barazisë së pjesëmarrësve në tendera apo ankande publike”, parashikuar nga neni 258 i Kodit Penal.

Balluku akuzohet se ka vepruar në bashkëpunim me ish-zyrtarë të lartë të ARRSH-së dhe Ministrisë së Infrastrukturës, në një proces që, sipas SPAK, ka shkaktuar dëme të konsiderueshme në buxhetin e shtetit.

Takimi i saj në Kryeministri, menjëherë pas zhvillimeve në SPAK, pritet të ngrejë pikëpyetje të forta për qëndrimin e qeverisë ndaj një prej figurave më të afërta të Ramës.