Përplasi për vdekje një person, AMP arreston inspektorin e policisë

Agjencia e Mbikëqyrjes Policore (Rajoni Elbasan – Korçë) ka arrestuar në flagrancë Inspektor D. Q., punonjës i policisë me detyrë Oficer i Patrullës së Përgjithshme / Trupë Shërbimi në Seksionin e Rendit Publik, pranë Komisariatit të Policisë Maliq, i dyshuar për shkelje të rregullave të qarkullimit rrugor, parashikuar në nenin 290 të Kodit Penal.

Arrestimi u bë i mundur pasi dje rreth orës 18:00, duke drejtuar mjetin e tij gjatë shërbimit, Inspektor D. Q. u përfshi në një aksident rrugor në aksin Maliq – Lozhan, që përfundoi tragjikisht me vdekjen e shtetasit B. H., banues në Maliq.

Materialet proceduriale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.

Agjencia e Mbikëqyrjes Policore rikujton përkushtimin e saj për garantimin e zbatimit të ligjit dhe fton qytetarët që të denoncojnë çdo rast abuzimi apo shkeljeje ligjore nga punonjësit e strukturave të policisë, duke telefonuar në numrin e gjelbër 0800 9090, dërguar email në [email protected], ose përmes WhatsApp në 0694151511. Përveç kësaj, qytetarët mund të përdorin aplikacionin “Agjencia Digjitale”, të shkarkueshëm nga Play Store dhe App Store.