Policia dhunon gazetarin: Më goditën me shkelma dhe grushte

Kryeredaktori i Dosja.al, Izmir Akulli, ka denoncuar dhunën që pretendon se ka përjetuar nga efektivët e Forcave të Ndërhyrjes së Shpejtë (FNSH) gjatë protestës së zhvilluar këtë të martë në Tiranë.

Në një lidhje të drejtpërdrejtë për Syri TV, në bisedën me gazetaren Armela Ferko, Akulli tregoi se incidenti ndodhi pranë Bankës së Shqipërisë, në momentin kur po filmonte disa efektivë që, sipas tij, po godisnin një student.

Gazetari deklaroi se një prej policëve iu drejtua pasi e pa duke regjistruar pamjet. Megjithëse, sipas Akullit, ai bërtiti se ishte gazetar dhe ndodhej në krye të detyrës, efektivi i mori telefonin nga dora dhe e përplasi në tokë, duke e dëmtuar.

Më pas, sipas rrëfimit të tij, në vendngjarje mbërritën edhe katër efektivë të tjerë, të cilët e goditën me grushte e shkelma dhe i hodhën spray në fytyrë.

Akulli tha se arriti të merrte telefonin dhe të largohej me vrap nga zona, për të shmangur vazhdimin e sulmit. Ai deklaroi gjithashtu se kishte mundur t’i dallonte efektivët, pavarësisht se ata mbanin skafandra dhe shkopinj gome.

Gazetari: Dhuna ndaj nesh ishte e paprecedentë

Pas ngjarjes, Akulli iu drejtua QSUT-së për një vizitë mjekësore. Gjatë lidhjes televizive, ai e përshkroi situatën e përjetuar si një përvojë që nuk e kishte menduar se mund t’i ndodhte gjatë ushtrimit të profesionit.

“Por dhuna që kam pësuar sot nga policia e shtetit nuk e mendoja të ndodhte, që të dhunohesh në këtë mënyrë nga autoritetet shtetërore në krye të detyrës”, u shpreh gazetari.

Ai tha se gjatë karrierës së tij kishte mbuluar protesta të shumta, si në terren, ashtu edhe nga redaksia, por sipas tij, ajo e së martës u shoqërua me dhunë të rëndë ndaj protestuesve dhe gazetarëve.

Akulli bëri të ditur se do t’i drejtohet Agjencisë së Mbikëqyrjes Policore (AMP) për të denoncuar ngjarjen dhe për të kërkuar përgjegjësi ligjore për efektivët që, sipas pretendimit të tij, ishin të përfshirë në sulm.

“Këtë çështje unë do ta ndjek në mënyrat ligjore, deri në fund”, deklaroi ai, duke shtuar: “Dhuna ndaj gazetarëve nuk mund të jetë e pranueshme”.

Denoncimi i gazetarit vjen pas përplasjeve të regjistruara gjatë protestës së studentëve në Tiranë. Pretendimet e tij për dhunën e ushtruar nga efektivët pritet të ndiqen përmes kallëzimit që ai ka paralajmëruar pranë AMP-së.