Përplasje e ashpër mes Xhafajt dhe Shabanit: Mos më fol si kryetar partie

Tensione dhe debate të forta janë regjistruar gjatë mbledhjes së Komisionit për Nismat Qytetare, Bashkëpunimin dhe Mbikëqyrjen Institucionale, ku u përballën drejtpërdrejt kryetari i komisionit, Fatmir Xhafaj, dhe Avokati i Popullit, Endrit Shabani.

Debati u nxit nga diskutimi mbi nivelin e zbatimit të rekomandimeve të institucionit të Avokatit të Popullit, një çështje që solli replika të forta mes dy zyrtarëve dhe tensionoi atmosferën në sallë.

Avokati i Popullit ngriti shqetësimin për performancën e institucioneve në raport me rekomandimet, duke theksuar një përqindje të ulët zbatimi, ndërsa reagimi i kryetarit të komisionit erdhi me tone kritike ndaj mënyrës së komunikimit.

Debati i plotë:

Shabani: “Vetëm 21% e rekomandimeve të Avokatit të Popullit zbatohen. Nëse ju jeni të kënaqur në lidhje me këtë performancë, unë nuk jam.”

Xhafaj: “Me çfarë jemi të kënaqur je dhe me çfarë jo… Duhet ta ndryshosh gjuhën, se po më flet këtu sikur je kryetar i partisë, jo Avokat i Popullit.”

Shabani: “Unë kam ardhur të përfaqësoj institucionin tim, ky koment nuk ju nderon. Nuk jam politikan.”

Xhafaj: “Ke qenë.”

Shabani: “Nuk kemi ardhur këtu të tregojmë çfarë kam bërë unë dhe ju në të shkuarën.”

Përplasja nxori në pah jo vetëm dallimet në qëndrime mbi funksionimin e institucioneve të pavarura, por edhe tensionet politike që shpesh shoqërojnë diskutimet institucionale.